Lē toe gafatia se isi mōkesi, a’afia le fale fa’atau ‘a se ulugali’i ‘i lōlōga na mafatia ai ‘Aukilani

‘Ua iai le popōlega ‘i se ulugāli’i ‘i ‘Aukilani ‘i Sisifo, ‘o le ‘a lē mafai ona lā toe gafatia se fa’atauina ‘o se fale, ina ‘ua a’afia le lā fale fa’atau ‘i lōlōga na mafatia ai ‘Aukilani ‘i le aso mālōlō mo le a’ai. Fa’aalia ‘e le ulugali’i, ‘e silia ma le tausaga ‘o fa’atali se tali atu ‘a le pūlegānu’u,  ma ‘o sō la’ua manatu, ‘e lē mafai ona la toe gafatia se isi mōkesi.

‘O Ella ma Ryan, sa galulue tumau uma, sa la’ua fa’aputu ma fa’asao lā teugātupe mo le tele ‘o tausaga, ma sa o’o lava ina fa’atau atu la filifili ‘auro, ma maua ai le 10 pasene ‘e tāofi ai le fale ‘i ‘Aukilani ‘i Sisifo, ‘e  $1.45 miliona tālā. Na’o le 10 masina talu ona la nonofo ‘i le fale,  ‘ae afātia loa le a’ai ‘i lōlōga ‘i le tausaga talu ai, ‘I le aso mālōlō fa’apitoa mo ‘Aukilani. ‘I se pepa ‘o fa’amatalaga, na tā‘ua ai ‘e le Pūlegānu’u ‘a ‘Aukilani, ‘o le tau ‘o le fanua ma le fale,  sa fuafua ‘i lona tau ‘i le maketi ‘a ‘o le’i o’o ‘i lōlōga.

‘O le tau ‘o le fale pei ona iloiloīna ‘e le Pūlegānuu ‘a ‘Aukilani ‘e fua ‘i le māketi, ‘e $1.37 miliona tālā. ‘O le $1.1 miliona tālā sa fa’atupe ‘e le Komisi ‘o Inisiua ma Mafui’e. ‘E le gata i lea, ‘o le ‘a tō’ese ‘e le pūlegānu’u le 5 pasene ‘o le tau ‘a le maketi ‘o le fanua, ‘e avea ma sao ‘o tagata e ana fale, ina ‘ia maua ai ‘e le ulugalii le sili atu ‘i le $205,000 mai le pūlegānuu. ‘I se fa’amatalaga ‘a Ryan, ‘e fa’apea na fa’aalia ‘e le Pūlegānuu ‘a ‘Aukilani, ‘o le polokalame fesoasoani ‘e le ‘o fa’amoemoe ‘e totogi ai tupe gau, a ē na mafatia I lōlōga.

‘O le faʻamoemoe ‘autū ‘o le polokalame lagolago, na mālilie faʻatasi ma le mālō, ‘o le fesoasoani lea i tagata ‘e ō ese mai tulaga ‘o a’afiaga mai ‘i āfā ma lōlōga. Fa’aalia ‘e le Minisitā ‘o Fa’alavelave Fa’afuase’i Mark Mitchell, ‘e ui ‘o le toe fa’aleleia ‘o fale ‘o lo’o lagolagoina ‘e le mālō, ae sa ta’ita’ia lava fa’alotoifale, ma e lē talafeagai mo ia ona faia se fa’amatalaga ‘i matā’upu tau ‘i pūlegānu’u.

ATA: RNZ