Lē taliaina le apili ‘a le tamā ‘e 163 mōliaga na fa’amaonia, ‘e vave ai ‘ona māgalo ma le falepuipui

‘Ua lē taliaina le talosaga ‘a David Rata Bagley ‘o Kalaiesetete, 43 tausaga le matua, ‘e vave ai ‘ona māgalo mai le falepuipui, ‘ona ‘o a’afiaga ‘e o’o ‘i lana fānau ‘e to’a 11.  ‘E 25 tausaga ‘o faia ‘e Bagley le gaoi ‘i fale’oloa ma isi solitūlāfono ma ‘e 163 ona mōliaga na fa’amaonia ‘i fa’amasinoga.  ‘O le māsina ‘o Fepuari 2024, na fa’asala ai ‘i le falepuipui mō tausaga ‘e lua ma māsina ‘e fā ‘ona ‘o le fa’aleaga ‘o ni meatōtino, faia se taufa’amata’u na te fa’ao’o le oti ‘i se tagata, fa’ao’olima ‘i se tagata ‘o le ‘āiga fa’atasi ai ma mōliaga ‘e 11 ‘o le gaoi.

‘Ua fa’alua ‘ona tūla’i ‘i luma ‘o le Komiti ‘o le Palola, ‘o ‘Aperila ma Sētema 2024 ma sā tē’enaina ‘uma.  ‘E toe tūla’i ‘i luma ‘o le komiti ‘i le māsina ‘o Me.  Sa iai fo’i taimi na musu ai Bagley ‘e ‘āuai ‘i polokalame ‘o le ola toe fuata’iina ‘e ono fa’amālosi ātili ai lona tiute ‘o ia ‘o le matua pei ‘ona līpotia.

Link to RNZ (Article) translated by Savelina Kasiano: https://www.rnz.co.nz/news/national/538393/christchurch-father-of-11-david-bagley-loses-court-of-appeal-bid-for-early-prison-release

Ata: RNZ / Rebekah Parsons-King