Lē pāsia le pili tau fa’aofi ‘o le Treaty Principles ‘i lona faitauga lona lua ‘i le Palemene

‘Ua lē pāsia le pili taufa’aofi ‘o le Treaty Principles ‘i lona faitauga lona lua ‘i le palemene, pei ona iai felāfolafoa’iga ‘i le Maota fono ananafi.

‘E to’a 112 faipule na tete’e ‘i le pili, lea na lē pāsia ai ‘e ui ‘i le fīnau atu ‘o le ta’ita’i o le ACT David Seymour ‘o lē ‘e ana le pili taufa’aofi. ‘E na’o le pāti ‘a le ACT na lagolagoina le pili,’i pālota ‘e 11.

Na tūtūlala’i faipule mai ‘i pātī na tē’enaina le pili taufa’aofi, ma patipati, ‘ae lagiina ‘e tagata lautele na ‘āuai se waiata, pei ona fa’atagaina ai ‘e le fofoga fetalai.’I ni nai sēkone talu ona ‘āmata le saunoaga ‘āmata ‘a Seymour, ‘ae fa’alavelave iai se tagata sā ‘i le aofia, na ia ‘āmata usuina se pese ‘i le Gagana Māori, ma ‘e le’i talia lelei ‘e le fofoga fetalai. Sā fautuaina ‘e le fofoga fetalai iā Brownlee le aofia na ‘āuai, ‘o le ‘ā fa’amalosia ona ‘ave ‘i fafo ma le Maota fono se tagata ‘e toe fa’alavelave ‘i saunoaga ‘a faipule.

Sa saunoa fo’i le ta’ita’i ‘o le Leipa Chris Hipkins, ‘e tū mālosi ‘e tete’e ‘i le pili taufa’aofi, ma ‘o le aumai ai ‘o lea pili ‘i le palemene, ‘e lē ō gatasi ma aiaiga, ‘a’o le fa’avae ‘o lenei atunu’u ‘o Aotearoa Niu Sila. Na fa’atonuina le faipule ‘o le Leipa Willie Jackson, ‘e tu’ua le potu fono ona ‘o ni ana lafoga na ia vala’au ai iā Seymour ma fa’aigoa o se tagata pepelo.

Na saunoa le Minisitā mō Fa’amasinoga Paul Goldsmith, na fai ma sui ‘o le Vāega Fa’a’upufai ‘a le National, ‘e fa’apea, na iloa lava le i’uga ‘o le fa’agāsologa ‘o lea pili ‘i le taimi fa’atoa tau fa’aofi mai ai ‘i le Pālemene. Na saunoa Casey Costello ‘o le NZ First ‘e fa’apea, ‘afai ‘ae pāsia le faitauga lona lua, ‘e manino ua fīnau ‘i le fa’amasinoga, ma ‘o se tūlaga ‘e lē mo’omia ‘e Niu Sila ‘i le taimi nei.

Na saunoa Hana Rawhiti ‘o le sui ‘o le pāti ‘a Māori, ma ‘o lē fo’i sā ta’ita’iina le haka ma sasaeina le pepa ‘o le pili, ‘i le faitauga muamua ‘o le pili. ‘I se saunoaga ‘a Seymour ‘i luga le 1News, ‘e fa’apea, ‘e le’o le i’uga lea ‘o lana matā’upu, ma ‘o le ‘ā sa’ili nisi ‘auala ‘e fa’amanino ai le talitonuga ‘a lana Vāega Fa’a’upufai ‘e uiga ‘i le Feagaiga ‘o le Waitangi.  

Link to 1News (Article) translated: https://www.1news.co.nz/2025/04/10/treaty-principles-bill-voted-down-amid-fiery-mp-debate/

ATA: Supplied (1News).