Lē mafai ‘ona iloa ‘e Chris Bishop pe fia gāluega ‘e fa’amuta pe ‘ā tu’ufa’atasi ni matāgāluega

‘E lē ‘o mafai ‘e le Minisitā ‘o Fela’uā’iga ‘ona fa’ailoa pe to’afia tagata ‘o le ‘ā lē toe maua a lātou gāluega ‘a’o fuafua le faigāmālō ‘e tu’ufa’atasi nisi ‘o matāgāluega.  ‘E tusa ma le 1300 le aofa’iga ‘ātoa ‘o tagata faigāluega ‘i totonu ‘o ia matāgāluega.

‘Ua fuafua Chris Bishop ‘e asiasi ‘i matāgāluega fa’atasi ma isi minisitā ma talanoa sa’o ‘i le ‘aufaigāluega ia ‘o le ‘ā a’afia ai, ‘i nai aso ‘o lumana’i nei.  Na fa’asilasila ‘e le faigāmālō le faia ‘o se matāgāluega telē, ‘e aofia ai fale, fela’uā’iga, si’osi’omaga ma gāluega ‘a matā’upu  fa’alōtoifale.  ‘O le ‘ā tu’ufa’atasia ‘i le matāgāluega fou ‘o le Ministry of Cities, Environment, Regions and Transport.

Na saunoa Chris Bishop, ‘o se fa’aeaeaga mō ia le ‘avea ma minisitā mō le tele ‘o ia matāgāluega.  ‘O le fa’asilasilaga lea na faia, ‘ina ‘ia fa’amanino ma fa’amautinoa ‘i tagata lautele fa’apea ē ‘o lo’o gālulue ‘i ia lālā, ‘o le ‘ā tupu lava pē taunu’u le tu’ufa’atasiga ‘o ia matāgāluega, mā ‘o se matā’upu na fa’atalanoa fa’alaua’itele mō le tolu ‘i le fā māsina ‘ua tuana’i.

‘O lana saunoaga ‘i tagata ‘o ia matāgāluega ‘o le ‘ā tu’ufa’atasia, ‘e matuā maualuga lava le fa’atinoga ‘o a lātou gāluega.  ‘E tusa ma le $30 miliona na fa’aagaga ‘e tu’ufa’atasia ai ia matāgāluega peita’i na fa’aalia ‘e le minisitā, ‘e lē vave maua ni fa’amanuiaga ‘i le isi lua tausaga mai le tu’ufa’atasiga ‘o ia matāgāluega ‘ae ‘o le ‘ā va’aia lava ‘i nai tausaga ‘o mulimuli mai.

Link to RNZ (Article) translated: https://www.rnz.co.nz/news/political/581980/chris-bishop-can-t-say-how-many-jobs-could-be-lost-to-multiple-ministries-merger

ATA: RNZ / Mark Papalii