Lē lava tausi soifua, to’atele tele po’o na’o ni fuainūmera fa’afoliga?

‘E faitau fia selau le aofa’iga ‘o tausi soifua ‘i totonu ‘o Niu Sila ‘e lēai ni gāluega, ‘o lo’o vala’aulia ‘ina ‘ia fa’atumu gāluega tāua tele ia ‘e le’o iai nisi ‘o fa’atinoina, mā ‘e to’atasi mai le to’afā tausi soifua fou fa’ato’ā māe’a ‘ona fa’au’u, ‘e le’o maua ni gāluega. 

‘E silia ma le 7000 tagata ‘o lo’o ā’o’oga fa’atausi soifua, ‘e aofia ai le to’a 535 na māe’a a lātou su’ega fa’ai’u’ i le māsina talu ai, peita’i, ‘e to’a 160 ‘e le’i maua lava ni gāluega ‘e ala atu ‘i le lālā ‘e ave ‘i ai ni talosaga mō ni avanoa faigāluega.  Na tā’ua ‘e le pule sili ‘o le Lālā ‘a tamaiti ‘ā’oga mō le Fa’alāpotopotoga ‘o tausi soifua ‘a Niu Sila, ‘o fuainūmera pito lata mai ‘a le Mālō, ‘o lo’o fa’ailoa ai pe tusa ma le 1000 le fuainūmera e le’o lava ai tausi soifua ‘i le atunu’u peita’i ‘e iai lona talitonuga, ‘e maualuga atu le fuainūmera.  ‘E le’o aofia ai le aofa’iga ‘o tausi soifua ‘ua tu’ua le atunu’u, ‘e le’o faitaulia ai fo’i le lē lava ‘o tausi soifua ‘i ‘au’aunaga tau ‘i le soifua mālōlōina ‘o le māfaufau, ‘o le soifua mālōlōina ‘o tinā ma tama’ita’i, fa’apea fo’i fānau iti ma le lē lava ‘o tausi soifua ‘i le primary health. 

‘E le’o faaleleia lava lea fa’afītauli, mā ‘o le fa’aitīitia ‘o pāketi ‘i taimi ‘o lo’o a’afia ai gāluega ‘a tausi soifua, ‘e lē se tūlaga ‘e talafeagai.  Na ia fa’aalia, ‘ātonu ‘e mo’omia le tāofi mō se taimi lē tūmau ‘o avanoa mō tausi soifua fa’avāomālō se’ia lava le avanoa ‘e lagolago ai mō i lātou.  Na tā’ua ‘e se tasi na ‘avea ma peresetene ‘o le Āsosi ‘o tausi soifua Filipino, Monina Hernandez, ‘e mo’omia lava ‘e Niu Sila nisi tausi soifua se to’atele ‘ina ‘ia mafai ‘ona ‘ausia le tūlaga saogalēmū ‘o le lava ‘o tausi soifua ‘e va’aia tagata gasegase.  ‘O le ā fa’afaigāluega muamua ‘e le mālō tausi soifua ‘i totonu ‘o le atunu’u, ‘a’o le’i ‘a’apa atu ‘i isi atunu’u. ‘E tāua tele lea faiga, ‘e tāofia ai tausi soifua ‘i Niu Sila ma tausia mana’oga ‘o tagata ‘o le atunu’u ‘i lo lātou ola mālōlōina.

Link to RNZ (Article) translated by Savelina Kasiano: https://www.rnz.co.nz/news/national/524325/not-enough-nurses-too-many-or-an-artificial-glut

ATA: RNZ / Supplied.