Lē lagolago le National ma le NZ First ‘i le Pili ‘o le Treaty Principles Bill

‘E le’o ano tele le ta’ita’i ‘o le ACT David Seymour ‘i finagalo ‘o lo’o fofogaina ‘i le fa’amamāluga ma patipatiga ‘o le fa’anofo tupu ‘a le Tupu ‘o Māori ‘aemaise ‘o vāega fa’aupufai ‘o lo’o lātou faipā’aga ‘i le faigāmālō so’ofa’atasi, ‘e uiga ‘i le Treaty Principles Bill, po’o le Tūlāfono tau fa’aofi ‘o ta’iala fa’avae ‘o le Feagaiga ‘i Waitangi. 

Na folafola ‘e le Palemia Christopher Luxon fa’apea fo’i ma Shane Jones ‘o le New Zealand First ‘i luma ‘o le Tupu ‘o Māori ‘i patipatiga ‘i le Aso Gafua, ‘e lē ‘ausia ‘e le Pili luma atu ‘o le faitauga muamua ‘i le Palemene.  ‘Ae na saunoa Seymour, ‘e le’i māe’a ‘ona tūsiaina le tūlāfono, mā ‘e le’i tagataga’i ‘i ai vāega fa’aupufai ‘o lo’o gālulue ‘i le faigāmālō so’ofa’atasi ma ‘e le’i va’ai fo’i ‘i le tali ‘a le atunu’u lautele.  ‘O lo’o mālosi pea le talitonuga ‘o le ta’ita’i ‘o le ACT, ‘e mafai lava ‘ona ia fa’asufiina ana pā’aga ‘o la lātou faigāmālo so’ofa’atasi ‘e lagolago ‘i le Pili ‘a’o le’i folasiaina ‘i le Palemene ‘i nai māsina ‘o lumana’i.  ‘E vaiaso ‘ātoa ‘o lo’o fai ai ia fa’amamaluga ‘o le fa’anofo tupu ‘o le Tupu ‘o Māori, ma ‘o le 18 ai fo’i lea ‘o tausaga talu ‘ona tu’umālō le Tupu Tama’ita’i Māori, Dame Te Atairangikāhu.

Link to RNZ (Article) translated by Savelina Kasiano: https://www.rnz.co.nz/news/political/525564/watch-turangawaewae-welcomes-politicians-for-koroneihana

ATA: Prime Minister Christopher Luxon. RNZ / Nick Monro.