Lē fiafia fai fa’atoaga ma ‘āiga ‘e nonofo ‘i nu’u ‘i tua ‘i le fa’ai’uga ‘a le mālō ‘e tāofia ai pasi mō tamaiti ā’oga

Tā’ua mai le matuā lē fiafia ‘o le ‘au faifa’ato’aga ‘ātoa ma ‘āiga ‘e nonofo ‘i nu’u ‘i tua ‘o Niu Sila, ‘ona ‘o se fa’ai’uga ‘a le faigamālō, ‘e toe iloilo ai ma tāofia ai ‘auala mō pasi ‘a tamaiti ā’oga ‘e nonofo ‘i ia vāega ‘o le atunu’u.

‘E manatu le ‘aufaifa’ato’aga, ‘o lenei fa’ai’uga, ‘e āfāina tele ai nu’u lāiti ‘e taumamao mai le taulaga, ma faigatā ai ‘ona ō tamaiti ‘e nonofo ai ‘i le ā’oga.

‘O auala mō pasi ‘a tamaiti ā’oga, ‘e fai ma toe iloiloina ‘e le Matāgāluega ‘o A’oga, mai lea taimi ‘i lea taimi, ‘e fa’alagolago ‘i nisi ‘o māfua’aga, ‘e aofia ai talosaga mai ā’oga ‘e uiga ‘i ni suiga ‘e tūla’i mai, ‘ātoa ai ma le fa’aleleia ‘o isi ‘auala ‘o fela’ua’iga ‘i ia vāega ‘o le atunu’u, ‘aemaise pe ‘ā to’aitiiti ma tau lēai nisi ‘e fa’aaogāina lenei ‘au’aunaga.

Sā fa’amamafaina mai ‘e le matāgāluega, ‘o le fa’asaoina ‘o tupe, ‘e lē ‘o le ‘autū lea ‘o lenei fa’ai’uga.  ‘O le tausaga nei lava ia, ‘ua o’o ‘i le 280 le aofa’i ‘o ‘auala ‘o pasi ‘a tamaiti ā’oga ‘ua toe iloiloina ai, ‘e aofia ai le 39 ia ‘ua tāofia pē ‘o le ‘ā lē toe fa’aauauina.

Na fa’aalia ‘e le matāgāluega, ‘o le māfua’aga ‘autū, ‘ona ‘ua ‘i lalo ifo ‘o le to’avalu le aofa’i ‘o tamaiti ‘e fa’aaogāina lenei ‘au’aunaga, ‘ātoa ai fo’i ma isi māfua’aga ‘e aofia ai le lē agava’a ‘o nisi tamaiti ā’oga ‘i le fesoasoani lenei ‘a le Mālō.  ‘O tamaiti ‘e fa’apitoa ‘i ai lenei ‘au’aunaga, ‘e tatau ‘ona tausaga muamua āga’i ‘i le tausaga valu, ma  ā’o’oga ‘i ā’oga ‘a le Mālō aupito latalata ‘i o lātou ‘āiga ‘i le mamao ‘e sili atu ‘i le 3.2 kilomita ‘a’o tamaiti ā’oga ‘i ā’oga maualuluga ‘e tatau ‘ona 4.8 kilomita le mamao ‘o ā’oga ‘e ā’o’oga ai mai o lātou ‘āiga.

Link to RNZ (Article) translated by Lauano Ati Ilaoa: https://www.rnz.co.nz/news/thedetail/533395/rural-families-panic-as-government-slashes-school-bus-routes

ATA: RNZ.