Lata ‘i le kuata ‘o tagata penefiti ‘e le’i sa’o le totogiga ‘o a lātou tupe – lipoti
‘E lata ‘i le to’atasi mai le to’afā tagata penefiti, ‘ātonu ‘e lē sa’o le fesoasoani po’o le lagolago sa faia mō ‘i lātou ‘e tusa ai ma se līpoti fa’aletausaga ‘a le Matāgāluega ‘o le Ātina’ega ‘o Aga feso’ota’i. ‘E na’o le 77.6 pasene ‘o tagata, sā sa’o le iloiloga ‘o a lātou penefiti ‘e agava’a ‘i ai ‘i le tausaga 2023/2024. ‘Ua sili atu ‘ona fa’alētonu nai lō le tūlaga sā iai le fa’ai’uga ‘o līpoti ‘i le tausaga ‘i tua atu, ‘e 82.7 pasene, ma ‘ua matuā maualalo ifo mai le tūlaga fia ‘ausia ‘a le matāgāluega, ‘ia lē i lalo ifo ‘o le 95 pasene. ‘O le tala ‘a le matāgāluega, ‘ua māfua lea tūlaga, ‘ona ‘o le faigatā ma le ogaoga ‘o matā’upu, ‘ae lē gata ‘i lea, ‘e tele polokalame ‘e feagai ma le ‘aufaigāluega ‘o lo’o pito ‘i luma ‘i le fa’atinoga ‘o ia ‘au’aunaga.
Na tūla’i le Minisitā mō le Atīna’ega ‘o Aga Feso’ota’i, Louise Upston ‘i luma ‘o faipule ‘i le Aso Lulu, ‘o se vāega ‘o iloiloga ma sa ia ta’u atu ‘i faipule, ‘e moni ‘e matuā telē lava le gāluega ‘e toe fai, ‘e fa’aleleia ai ia fa’afītāuli. ‘O le fua fa’a’ōgātotonu ‘o ‘aitālafu na ‘ova ‘ona totogi sa fa’amauina ‘i le $2948, ‘ua sili atu ‘ona fa’alētonu nai lō le tausaga ‘i tua atu, ‘e $2850. Na fesiligia le Minisitā ‘e le faipule ‘o le Green, Ricardo Menendez March, pe lātou te taliaina le to’atele tele ‘o tagata penefiti sā la’itiiti ifo a lātou tupe na maua nai lō le tūlaga ‘e tatau ‘ona iai ma ātili feagai ai ma faigatā, po’o le ‘ova ‘ona totogi iai ‘o tupe, ‘ona toe āfāina lea ‘i ‘aitālafu ‘o tupe ‘ua ‘ova ‘ona totogi ‘i ai. Na tali Upston, ‘o se lu’itau tele lea fa’afītāuli peita’i ‘o lona fa’anaunauga, ‘o le ‘ā fa’aleleia le moni ‘o nei tupe aofa’i, ‘i se polokalame tele ‘ua fuafuaina, ‘e si’itia ai le ‘au’aunaga fa’atēkonolosi ‘a le matāgāluega.
Link to RNZ (Article) translated by Savelina Kasiano: https://www.rnz.co.nz/news/political/535646/almost-a-quarter-of-beneficiaries-being-paid-incorrectly-report
ATA: Social Development Minister Louise Upston says MSD has more work to do to improve its accuracy. RNZ / Angus Dreaver