Lapata’iga ‘o savili mālolosi ma le tetele ‘o galu ‘i ni vāega ‘o le Motu ‘i Mātū ma Saute

‘Ua fa’ailoa atu ‘i le atunu’u ‘e le ‘Ōfisa Vā’aitau ni lapata’iga ‘o savili mālolosi mō Uēligitone, sasa’e ‘i Seddon ‘i Marlborough fa’apea ma le Marlborough Sounds ‘āmata mai le ītūlā ‘e 8 ‘i le pō ā nānei, fa’apea lapata’iga mō lā’au ma pou ‘eletise ‘o le ‘ā fa’aleagaina, fa’atasi ai ma nisi meatōtino ‘e le’o lelei ‘ona fa’amaumau.

‘O le taimi nei lea ‘ua a’afia talāfātai ‘i saute ‘o Uēligitone ma Wairarapa ‘i lapata’iga ‘o galu maualuluga.  ‘E iai nisi ‘o malaga ‘a va’a ‘o le Interislander ma le Bluebridge ‘ua lē fa’ataunu’uina ‘i le asō ma le Aso Faraile fa’apea ai ma le Aso To’ona’i.   Na tā’ua ‘e le MetService, ‘e o’o atu ‘i le 6 mita le maualuluga ‘o galu ‘e ono fafati ‘i le taeao ‘o le Aso Faraile ma ono o’o atu lava ‘i le fitu mita le maualuluga. 

Peita’i, na fa’aalia ‘e le Pūlega ‘o le Puipuiga Lautele ma Fa’alavelave Fa’afuase’i ‘a Uēligitone, ‘o le maualuluga ‘o galu, ‘e lē’o tutusa ma le tūlaga lea na a’afia ai le ‘a’ai ‘i nai vaiaso ‘ua tuana’i atu, ma ‘e ono lēai fo’i se fuafuaga ‘e fa’amālosia ai nisi ‘e ō ‘ese mai o lātou fale. 

‘O le fautuaga ‘a le Lālā ‘o Fela’ua’iga ‘i ‘aveta’avale ‘ina ‘ia fa’aeteete ‘i taimi ‘o feoa’iga, ma ‘e tatau fo’i ‘i ‘aveta’avale ‘ona nofo sāuni mō taimi ‘e mālolosi ai savili ‘aemaise ‘o ta’avale maualuluga ‘e pei ‘o vans, loli ma campervans, fa’apea fo’i ‘i uila afi. 

Link to RNZ (Article): https://www.rnz.co.nz/news/weather/620342/high-winds-and-heavy-swells-in-lower-north-upper-south-islands

IMAGE/ATA: RNZ / Samuel Rillstone