Lapata’iga mō Niu Sila ‘ina ‘ia sāuni mō se si’osi’omaga lē mautonu tau fefa’ataua’iga tusa po’o ai ‘e mālō ‘i le pālota ‘a ‘Amerika

‘Ua lapata’ia le Mālō ‘o Niu Sila, ‘ina ‘ia sāuni mō se si’osi’omaga lē mautonu ‘i le itū tau fefa’ataua’iga, ‘e tusa lava po’o ai ‘e manumālō mai ‘i le faigāpālota ‘a le Iūnaite Setete ‘o ‘Amerika ‘i le vāiaso nei.  Na fa’ailoa mai ‘e le ‘au atamamai ‘i matā’upu tau fefa’ataua’iga, ‘o faiga fa’avae ‘a sui tauvā ‘autū ‘iā Donald Trump fa’apea ai ma Kamala Harris, ‘i le fia puipuia lea ‘o le tamāo’āiga ‘o ‘Amerika, ‘e ono telē se āfāina ai ‘o atunu’u ma mālō ‘e pei ‘o Niu Sila, ‘ia ‘ē fa’alagolago mālosi lo lātou ātina’e ma le tamāo’āiga ‘i mea tau fefa’ataua’iga ma isi mālō.

‘O lea ‘ua fa’ailoa mai ‘e Donald Trump se lāfoga ‘e 20 pasene mō ‘oloa ‘uma mai atunu’u ‘i fafo ‘e fa’aulufale atu ‘i ‘Amerika, pe ‘ā fai ‘e toe tūla’i mai ‘o ia ‘i le tofi Peresetene, ‘ae ‘o Kamala Harris, lea ‘o lo’o ‘avea nei ma sui ‘o le faigāmālō ‘a ‘Amerika, ‘o lo’o faia ni tiute ma ni lāfoga mō nisi vāega ‘o ‘oloa mai fafo ‘o lo’o fa’aulufale atu ‘i le Iūnaite Setete.

‘I se talanoaga ‘a le fa’atonu ‘o le Fono ‘a le ‘Au Faipisinisi Fa’avāomālō ‘a Niu Sila, le ali’i ‘o Stephen Jacobi ma le Uaeālesi Fa’asalalau ‘a Niu Sila, na ia tā’ua ai ‘e fa’apea, ‘o le fuafuaga ‘o le lāfoga ma le tiute mō ‘oloa mai fafo pei ‘ona mana’o ai Donald Trump, ‘o se tūlaga ‘e fa’apopoleina ai, ‘ā fai ‘o le ‘ā a’afia ai ‘oloa ‘uma ‘a Niu Sila ‘o lo’o fa’atau atu ‘i māketi ‘o ‘Amerika, ‘e mautinoa lava, ‘o le ‘ā ogaoga ma telē le fa’afītāuli ‘o le ‘ā o’o ‘i ai.

‘O le taimi nei ‘e tele ‘oloa ‘ese’ese ‘a Niu Sila, ‘o’lo’o fa’atauina atu ‘i māketi ‘o ‘Amerika, ‘o le tau ‘o ia ‘oloa ‘i le taimi nei ‘e o’o ‘i le $8-Piliona Tālā ‘i le tausaga, ‘e tali tutusa ma le tau ‘o ‘oloa ‘o lo’o fa’atau atu ‘i ‘Ausetalia, ‘ae maualalo pe ‘ā fa’atusa ‘i le tupe ‘o lo’o maua mai ‘e Niu Sila ‘i ana ‘oloa ‘o lo’o fa’atauina atu ‘i le atunu’u ‘o Saina.

Na tā’ua fo’i ‘e le ali’i fa’atonu ‘iā Stephen Jacobi, ‘o le tele ‘o ‘oloa ‘a Niu Sila mō māketi ‘o ‘Amerika, ‘e le ‘o iai se tiute ‘i le taimi nei, ‘a’o isi ‘oloa ‘o lo’o totogi ai se tiute māmā.  Peita’i na ia fa’aalia, ‘ā fai ‘e fa’aopoopo le 20 pasene pei ‘ona fa’atūla’i mai ‘i le tiute ‘o ‘oloa ‘e pei ‘o le uaina, po’o i’a, ‘ātoa ai ma ‘a’ano ‘o manufasi, ‘ona mautinoa lea ‘o le ‘ā matuā telē lava se āfāina ai ‘o le tamāo’āiga ‘o Niu Sila, ‘ona ‘o ‘a’ano ‘o manufasi, ‘o le ‘oloa aupito ‘i tele lea ‘a Niu Sila ‘o lo’o fa’atauina atu ‘i māketi ‘o ‘Amerika.

 Link to RNZ (article) translated by Savelina Kasiano:https:https://www.rnz.co.nz/news/business/532841/why-new-zealand-should-worry-about-trade-regardless-of-who-wins-the-us-election

Tariffs into US markets could be disastrous for our beef industry, experts say. Ata: Sophie Barnes