Lapata’iga mō faiga taufa’asesē ‘ona ‘o le fa’alētonu ‘o le tēkonolosi ‘a le CrowdStrike

‘Ua lapata’iina tagata Niu Sila ‘e le ‘au fai tōfā mō feso’ota’iga fa’atēkonolosi, ‘ina ‘ia māta’itū lelei ni faiga taufa’avalea, ‘e āfua mai le taimi na fa’alētonu ai le tele ‘o feso’ota’iga fa’atēkonolosi mai le suiga ‘o le polokalame ‘o komipiuta ‘a le kamupanī ‘Amerika ‘a le CrowdStrike ‘i le Aso Faraile talu ai.  ‘Ua līpotia le fa’aaogaga ‘e le ‘au gāoi ‘o lea avanoa ‘e taumafai ‘e fa’aleaga pe tatala fa’asolitūlāfono ai komipiuta po’o masini mō feso’ota’iga fa’atekonolosi ‘a tagata. 

‘E tele fa’alētonu na tutupu ‘i le Aso Faraile talu ai, ‘e lē gata na lē mafai ‘ona toe fa’aaogāina ai pepa tala tupe ‘i fa’atauga ‘i fale’oloa ma isi ‘au’aunaga, ‘ae na tolopōina ai feoa’iga ‘a nisi ‘o va’alele ‘i isi vāega ‘o le lalolagi.  Nā tā’ua ‘e Jordan Heersping ‘o le National Cyber Security Centre ‘a Niu Sila, ‘e tatau lava ‘i tagata ‘ona toe siaki so’o se ‘īmeli ma tusitusiga ‘i telefoni ‘o lo’o lafoina atu mai le CrowdStrike po’o le Microsoft, ‘ona ‘ua o lātou molimauina ni itū’āiga feso’ota’iga fa’apea. 

‘O ia feso’ota’iga ‘o ni faiga taufa’asesē, mā ‘e ono tatala ai ‘e tagata ni ‘īmeli ‘e lafo atu, ‘ae ‘o lo’o iai ma ni vairusi ‘e fa’aleagaina ai masini pe mafai ai fo’i ‘ona ‘ave fa’agaoi o lātou fa’amaumauga ma meatōtino ‘e pei ‘o tupe.

ATA: RNZ