Lapata’iga mai le Google ‘e tusa ‘o talafou mai Niu Sila

‘Ua faia se lapata’iga ‘a le kamupanī tele fa’alevāomālō, ‘o le Google, e fa’apea ‘e ono fa’amālosia ‘i lātou ‘e tāofi ma lē toe fa’alauiloaina ‘iā lātou fa’asalalauga ‘iā Niu Sila, pe ‘ā fai ‘o le ‘ā taunu’u ‘ona faia lana Tūlafono lea ‘e fa’aigoaina ‘o le Fair Digital News Bargaining Bill.

‘E lē gata ‘i lea, ‘ae ‘o le ‘ā motusia ai fo’i ma so’otaga ‘o le Google ma nisi ‘o ‘ōfisa ma fa’alāpotopotoga fa’asalalau ‘i totonu ‘o Niu Sila nei.

‘O le pili lenei sā tāpena ma ‘āmata mea ai ‘e le faigāmālō ‘a le Labour, ‘o lona fa’amoemoe autū, ‘e fa’amālosia ai kamupanī tetele nei fa’alevāomālō, ‘e totogi mai lo lātou fa’aaogāina ‘o līpoti ma tala tusitusia ‘a fa’alāpotopotoga ma le ‘au fa’asalalau ‘i totonu ‘o Niu Sila.

Sā tē’ena ‘e le’i lagolagoina ‘e le pātī ‘a le National lea pili ‘a le faigāmālō ‘a le Labour, peita’i, ‘o lea ‘ua mana’o le faigāmālō so’ofa’atasi ‘o lo’o tū nei ‘i le foe, ‘ina ‘ia ūna’ia pea ma taumafai ‘ina ‘ia pāsia lea pili ma ‘avea ma Tūlāfono.

Na fa’ailoa mai ‘e le Fa’atonu ‘o le kamupanī ‘a le  Google ‘i totonu ‘o Niu Sila, le tama’ita’i ‘o Caroline Rainsford, , ‘o lo’o popole ma lē fiafia le Google ‘i lenei pili ‘ona ‘o le talitonuga, ‘e lē ‘o se faiga lelei lea ‘e gālulue fa’atasi ai mō le fa’asalalauina ‘o talafou ‘i le lumana’i.

‘O le pili ‘e pei ‘ona tā’ua, ‘o lo’o fa’atūla’i mai ai se lāfoga ‘e tatau ‘ona totogi mō feso’ota’iga, ‘e tā’ua ‘o le ‘link tax’, ‘e mana’omia le Google na te totogiina pe ‘ā feso’ota’i ma ‘upega ‘o feso’ota’iga tau ‘i talafou ‘i totonu ‘o Niu Sila.

Link to RNZ (Article) translated by Lauano Ati Ilaoa: https://www.rnz.co.nz/news/political/529862/google-threatens-to-stop-linking-to-nz-news-sites-if-bill-passes

ATA: Google Site. (Source: RNZ).