Lapataiga ‘i le fa’aaogāina ‘o le Paywave

‘O fa’alētonu lata mai nei, lea na motusia ai ma lē mafai ‘ona fa’aaogāina ‘auala ma tēkonolosi televavave, ‘e totogi ai fa’atauga ma ‘aitālafu ‘a tagata, ‘i le tele ‘o atunu’u ‘o le lalolagi, ‘ua toe fa’amālosia ai lagona ma manatu ‘o le to’atele, ‘ina ‘ia fa’aitīitia le ‘ave ‘o le fa’amuamua ‘i lea itū’āiga ‘o faiga, nai lō le fa’aaogāina ‘o tupe pepa fa’apea ma tupe siliva mō tūlaga māsani ‘o le soifuaga.

‘O se su’esu’ega na faia lata mai nei ‘e le Faletupe Fa’aleoleo, le Reserve Bank ‘o Niu Sila, na iloa ai ‘o le 43 pasene ‘o tagata ‘o le atunu’u, ‘o lo’o tele lava ‘ina o lātou fa’aaogā tupe pepa ma tupe siliva, ‘i mea ‘e manana’o ai.  Pe tusa ‘o le 3.5 pasene ‘o tagata ‘o Niu Sila, na iloa ‘i lenei su’esu’ega, lātou te lē fa’aaogāina ni tupe pepa ma tupe siliva pei ‘ona sā māsani ai, ma le isi aofa’iga fa’apea na o lātou fa’aalia ‘o le tele ā ‘o taimi lātou te fa’aaogāina ai ia tūlaga.

‘O le 80 pasene ‘o tagata lātou te fa’aaogāina pepa ‘a faletupe ia ‘e tā’ua o debit cards, ma ‘o ‘i lātou tonu ia sa iloga ‘ona āfāina ‘i le ‘āmataga ‘o le māsina nei, ‘ina ‘ua fa’alētonu masini komipiuta ‘e fa’alagolago ‘i ai feso’ota’iga televavave ‘a le lalolagi.

Līpotia mai ‘e le tele ‘o fale’oloa ma kamupanī le to’atele ‘o tagata fa’atau sā fa’ailoa lo lātou matuā lē fiafia ‘i fa’atau’oloa ma tagata faigāluega, ‘ona ‘o ia fa’alētonu, ‘ina ‘ua lē mafai ‘ona fa’aaogā ia cards ‘e totogi ai fa’atauga ma isi mana’oga māsani ‘o tagata.

‘E talu ‘ona tūla’i mai lenei fa’afītauli, ‘o lea ‘ua mātauina le toe fa’amālosia mai ‘o lagona ma manatu ‘o le to’atele, ‘ina ‘ia ‘aua le fa’atuatuana’i ‘i tupe pepa ma tupe siliva, ma ‘ia tau fa’amāmā le fa’alagolago atu ‘i pepa nei po’o bank cards, ia ‘e faigōfie ma vave ai ‘ona totogi ni fa’atauga ma isi mea ‘i le fa’aaogāina ‘o le PayWave, ‘e pei ‘ona ‘ua māsani ai le to’atele.

Sā fa’amamafaina mai fo’i, ‘e moni ‘e vave ma faigōfie ‘ona fa’aaogā le tēkonolosi, ‘ae tatau ‘ona silafia, ‘e iai fo’i ma le tau fa’aopoopo mō ia itū’āiga ‘o ‘au’aunaga, pe ‘ā fa’aaogāina.

ATA: Sāmoa Capital Radio (file).