Lapata’i ‘e le mālō pūlēgānu’u mō ni fuafuaga ‘e tu’ufa’atasi ai

‘Ua tu’uina atu ‘e le mālō se lapata’iga ‘i pūlēgānu’u, ‘ina ‘ia ‘uma ane le tolu māsina ‘o lumana’i, ‘ua fa’ao’o pe fa’ailoa atu, ni fuafuaga ‘i le tu’ufa’atasiga ‘o pūlēgānu’u, ‘ā lēai ‘o le ‘ā fai loa ‘e le mālō.  ‘O le folasaga lea na faia ‘e Minisitā ‘o Faigāmālō Lāiti, Simon Watts fa’apea ai ma le Minisitā ‘o le RMA Reform, Chris Bishop ‘i le aoauli ananafi.

‘O le māsina ‘o Nōvema lea na fa’asilasila ai ‘e le mālō, ‘o le ‘ā tu’ufa’atasia se komiti ‘e aofia ai pulenu’u ‘o itūmālō ma ‘a’ai ‘ae va’ava’ai ‘e le mālō ‘e tāpena ai ni fuafuaga fa’apea.  Peita’i, ‘i le folasaga ‘a minisitā ‘i le Aso Lua, na tā’ua ai, ‘ā fai ‘ae lē fa’aaogā ‘e pūlēgānu’u le faiga fou lea na tu’uina atu, ‘o le ‘ā fa’amālosia loa ‘ona fa’aofi ane ia suiga.

‘E fa’apotopoto pe fa’avae ‘e pūlēgānu’u ni a lātou kulupu, ma tu’uina atu ni a lātou fuafuaga mō ‘i lātou ‘i le mālō, ‘i ‘auala ‘e mānana’o ‘e fa’atūlaga ai.

Na talosaga Bishop ‘i pūlēgānu’u, ‘ina ‘ia ‘aua ne’i fa’afaigāluegaina ni konesale taugatā ‘e tāpenaina fuafuaga ‘e mānana’o ai.  ‘O le fa’amoemoega ‘o lo’o iai, ‘ina ‘ia faia fa’ai’uga ‘i le tausaga lenei, ‘ona fa’amautū lea ma sainia ‘i le 2027 ma fa’atino ‘a’o le’i faia le faigāpālota ‘a pūlēgānu’u ‘i le 2028.

Na saunoa Bishop, ‘e isi nisi pūlēgānu’u ma itūmālō ‘ua tāpena ‘e fa’atino le tu’ufa’atasiga, ‘e aofia ai Northland, Waikato, Bay of Plenty, Uēligitone, Wairarapa ma Hawke’s Bay.

Link to RNZ (Article): https://www.rnz.co.nz/news/political/594289/government-gives-councils-amalgamation-ultimatum

ATA: RNZ/Mark Papalii