Lagolagoina ‘e le Pūlega ‘o le ‘a’ai ‘o Invercargill le tete’e fa’asaga ‘i le fuafuaga mō le falema’i tele ‘o Dunedin

‘I le motu ‘i saute, ‘ua fa’ailoa mai le lagolagoina lea ‘e sui ‘o le Pūlega ‘o le a’ai ‘o Invercargill, ‘o le polokalame fa’alaua’itele, ‘o le “They Save, We Pay”, ‘e tete’e ai ‘i fuafuaga ‘a le Mālō mō le gāluega ‘o le falema’i tele ‘o Dunedin.

‘Ua ‘uma ‘ona fa’ailoa mai ‘e le faigāmālō so’ofaatasi ‘e fa’apea, ‘o le gāluega ‘o le falema’i fou mō Dunedin, ‘ā lē fa’aitīitia, ‘e tatau ‘ona fausia auaua’i, ‘ona ‘ua taugatā tele, nai lō le tau na mua’i fuafuaina ai.

‘O le līpoti ‘o se su’esu’ega na fa’atonuina ‘e le faigāmālō, ‘ua manino mai ai, ‘o le ata pei ‘ona iai nei ‘o lea falema’i, ‘e lē māfai ‘ona fausia ‘i le tupe ‘e $1.88-Piliona Tālā, ‘e pei ‘ona pāsia ai.

Na tā’ua mai ‘e le Minisitā mō Gāluega Tetele ‘a le Mālō, ‘o Chris Bishop, ‘e fia selau miliona isi tupe ‘e mana’omia mō lenei gāluega, mā ‘e manatu ‘e o’o ai lava ’i le $3-Piliona Tālā lona tau ‘ātoa.

 ‘Ae na fa’ailoa mai e le Pulenu’u ‘o Invercargill, ‘o Nobby Clark, ‘o le fuafuaga ‘e sui ma fa’aitīitia le ata ma tau ‘ole falema’i fou ‘o Dunedin, ‘e lē na’o tagata ‘o Dunedin ma le itūmālō ‘o Otago ‘e a’afia ai.

‘E tusa ‘o le kuata ‘o ma’i ‘e fa’aaogāina lenei falema’i tele, ‘e mai Invercargill fa’apea le itūmālo Southland ma Waitaki mā’ o le māfuaaga lea ‘o lō lātou lagolagoina ‘o le polokalame ‘e tē’ena ai le fa’amoemoe ‘o le faigāmālō ‘e sui ma fa’apa’ū ‘i lalo le tau ‘o lenei gāluega tele.

Link to RNZ (Article) translated by Lauano Ilaoa: https://www.rnz.co.nz/news/political/530680/invercargill-leaders-thrown-support-behind-dunedin-hospital-campaign

ATA: RNZ