Lāgā popōlega ‘i ‘au’aunaga fesoasoani mō Māori ma Pasefika ‘i suiga ‘a le Whaikaha

Na fa’aalia ‘e Dr Huhana Hickey, ‘o se lōia Māori ‘e finau mō tagata ‘e iai mana’oga fa’apitoa, lona popōlega ‘i le ono mou atu ‘o fesoasoani mō Māori ma Pasefika ‘i fuafuaga ‘a le mālō pei ‘ona faia ai suiga ‘i le Whaikaha, le Matāgāluega mō ē ‘e iai Mana’oga Fa’apitoa. 

Na ia tā’ua, ‘e iai ni vāega lelei ‘i nei suiga ‘i le fa’amālosiga ātili lea ‘o tōtōga ‘o le pōlisi, peita’i, ‘o le toe fa’aui ‘ese ‘o tupe, ‘o le itū lea ‘o lo’o popole ‘i ai.  Na fa’asilasila ‘e le Minisitā mō le Ātina’ega ‘o Aga Feso’ota’i, Louise Upston, ‘o le ‘ā ‘ave’ese matāfaioi mō le fa’atinoga po’o le tilivaga ‘o ‘au’aunaga lagolago, ma ‘o le ‘ā tūto’atasi le matāgāluega, ‘e lē toe fefa’asoaa’ia galuega ia ‘e gālulue fa’atasi ai mā le Matāgāluega ‘o Aga Feso’ota’i.  Na saunoa Hickey, ‘e lēai se tasi ‘o iai ‘i le Palemene ‘i le taimi nei, ‘o fai ma sui ‘o tagata ‘e iai mana’oga fa’apitoa, ‘o le ala lea na fa’atūina ai le matāgāluega ‘ina ‘ia lagona o lātou leo ‘i faiga ‘o pōlisi ma tūlāfono.  ‘O lo’o to’atele pea Māori ma Pasefika lātou te feso’ota’i ma ‘ave ‘i ai le lagolago.  Peita’i, ‘o le fa’afitāuli, ‘e le’o fa’aopoopoina lava ‘e le matāgāluega le pāketi.  Mā ‘e ui fo’i ‘o lo’o fa’aopoopo ni tupe ‘i le tausaga fa’aletupe, peita’i, ‘o lo’o maualalo pea nai lō le tulaga mo’omiaina, ‘ona ‘e le’o iai se faiga ‘e sa’ili ai se ‘auala ‘e fa’atupe fa’aauau ai le lagolago mō tagata ‘e iai mana’oga fa’apitoa pei ‘ona saunoa Dr Hickey.

Link to RNZ (Article) translated by Savelina Kasiano: https://www.rnz.co.nz/news/national/525466/concerns-raised-over-maori-and-pasifika-disability-support-in-whaikaha-s-restructure

ATA: Sāmoa Capital Radio (file).