‘Ioe Helena Jade Cribb ‘i lona so’aina ‘o se tamā 65 tausaga, ‘ae le’i tū lana taavale.

‘Ua ‘ioeina ‘e Helena Jade Cribb, ‘o se alo ‘e fa’asino iā Ron Cribb lea sā ta’alo ‘i le ‘Olopeleki, ona mōliaga ‘i le lē tū ‘o lana ta’avale le taimi na ia so’aina ai se tamā 65 tausaga le matua iā Jason Collins ma maliu ai ‘i ‘Aukilani ‘i le aso 7 ‘o Tēsema. Na tula’i Cribb ‘i luma le fa’amasinoga ‘i ‘Aukilani ‘i le aso ananafi, ma ‘ioeina ona mōliaga ‘o le ‘ave ta’avale fa’atamala. Na līpotia ‘e uō faigāluega ‘a Cribb, na lātou va’aia ‘e ‘ōnā le tama’itai ‘i se pātī ‘o le Kerisimasi na faia, ‘ae lumana’i tupu le fa’alavelave. Ma sā vili le uber ‘e alu ai Cribb ‘i lana ta’avale na paka mamao.

Sā ‘aveina ‘e le tama’ita’i lana ta’avale ‘ina ‘ua tu’u ‘e le Uber ‘i lana ta’avale, ma aga’i ‘i lona fale pē tusa ma le 27 kilomita le mamao, lea na tula’i mai ai le fa’alavelave. ‘E le’i fa’amaonia ‘e leoleo pē fa’asuā’avā Cribb, ‘ona sā lē mafai ona vave maua ‘e faia ai ni su’esu’ega ‘o le ‘ava mālosi. ‘I molimau ‘a leoleo mai ‘i su’esu’ega, sā ta’oto le tamā 65 tausaga ‘i luga ‘o le auala, ma sā pogisā fo’i lea taimi. ‘E le’o mautinoa pē ‘aiseā na ta’oto ai Collins luga le ‘auala, ma na toso ‘e le ta’avale ‘a Cribb lona tino pē tusa ma le 31 mita le mamao. ‘E le’i iai nisi na mōlimauina lea fa’alavelave pei ‘ona tā’ua ‘e le fa’amasino. Na logoina ‘e Cribb leoleo ‘ina ‘ua ia masalomia le tagata na taia ‘i lana ta’avale, ma sā ia fa’apea ‘e le’o se tagata. Na ia fa’amatalaina ‘i leoleo, sā mua ona tago ‘e sui le leitiō ‘o lana ta’avale, na ia leiloa ai le tamā na ta’oto ‘i le ‘auala.

Link to RNZ (Article) translated by Anna Fa’asolo: https://www.rnz.co.nz/news/national/527815/daughter-of-former-all-black-admits-hit-and-run-death

ATA: RNZ