Iloilo pea ‘e Niu Sila pe fa’asoa atu fa’amatalaga ‘o solitūlāfono ‘i mālo ‘o Mata ‘e Lima

‘O lo’o fa’aauau pea fa’atalanoaga ‘a Niu Sila ma ana pā’aga ‘i le fa’alāpotopotoga ‘o le Five Eyes po’o Mata ‘e lima, pe fefa’asoaa’i a lātou fa’amatalaga ‘o tagata solitūlāfono ‘a’o āfea fo’i ‘e fa’atinoina ai. 

‘O le Five Eyes, ‘e iai Niu Sila, ‘Ausetālia, Kānata, le Iunaite Setete ma Peretānia, mā ‘o lo’o gālulue fa’atasi ‘i pōlisi ‘o o lātou tuā’oi, fefa’asoaa’iga ‘o fa’amaumauga ‘o tagata fa’apea ma le tēkonolosi.  ‘Ua iai le fa’amoemoe ‘e fono ai le vāega mō le Criminal Database Checking group ‘i luga ‘o feso’ota’iga fa’aonapō nei, ‘i le fa’ai’uga ‘o le māsina nei.

‘I ni fa’amaumauga na fa’alauiloaina ‘i lalo ‘o le Tūlafono ‘o le Official Information Act, na fa’aalia ai, ‘e ono ni fono na faia ‘i luga ‘o ‘upegatafā’ilagi ‘i le tausaga talu ai, ma le fono muamua na fesāga’i ma fevā’aia’i ai ‘i le māsina ‘o Mati ‘i Uēligitone.

‘O lo’o ta’ita’ifono Niu Sila ‘i le taimi nei ‘i le Migration 5.  ‘E fefa’asoaa’i le kulupu ‘i au’ili’iliga ‘o fa’amaumauga ‘o femalāgāa’iga ma visa ‘o tagata mai fafo peita’i ‘o le taimi nei, ‘ē lē ‘o fa’asoaina atu fa’amaumauga o ō lātou lava tagatā nu’u.

Na tā’ua ‘i se fa’amatalaga lata mai ‘i Peretānia na fa’amaonia ai, ‘ua leva ‘ona fefa’asoaa’i ‘e le fa’alāpotopotoga fa’amaumauga ‘o tagātānu’u ‘o isi atunu’u ‘o le Migration 5 ‘i taimi ‘e talosaga ai mō ni visa.

Link to RNZ (Article) translated by Savelina Kasiano: https://www.rnz.co.nz/news/national/538498/new-zealand-still-considering-sharing-criminal-offending-info-with-five-eyes-nations

New Zealand’s Five Eyes partners continue talks about sharing the details of their citizens’ criminal offending. Ata: RNZ