Iloilo ‘e le Pūlēgānu’u itū lelei ma itū lē lelei ‘o fe’ese’esea’iga ‘i le McDonald’s ‘i Wanaka

‘E tolu aso ‘o lo’o fa’agāsolo ai ‘i le Pūlēgānu’u Fa’aitūmālō ‘o Queenstown Lakes District le folasaga ‘o finagalo fa’aalia ‘o sui ‘o le itūmālō ‘e fa’atatau ‘i le tatālaga ‘o se fale’aiga ‘a le McDonald’s ‘i Wānaka.  ‘E 366 finagalo tusitusia (submissions) na faia ‘e uiga ‘i lea fale’aiga.  ‘E 339 na tete’e ‘ae na’o le 21 na lagolagoina.  ‘O lo’o iloilo ‘e le pūlēgānu’u pe tu’u atu se fa’atagaga ‘e tatala ai le fale’aiga ‘e aofia ai le tatala ‘o le itū ‘e ui ta’avale ‘e fa’atau taumafa mai le fale’aiga po’o le drive through ‘e 24 itūlā ‘i le aso, fitu aso ‘o le vāiaso.

‘E tete’e mālosi le Wao Aotearoa Charitable Trust ma ‘e popōlega ‘o le fa’alāpotopotoga ‘i a’afiaga ‘o le ‘ā o’o ‘i ai le ‘a’ai.  ‘O le nofoaga lea ‘e tau fuafua ‘e fa’atū ai le fale’aiga, ‘e iloa lelei atu lava pe ‘ā ulufale atu ‘i Wānaka ma ‘e fesāga’i fo’i ma ni mata’aga iloga ‘e pei ‘o le Mount Iron.  Ma ‘ē lē ō gatasi ma fa’amoemoega ‘o le ‘a’ai ‘e puipuia ma fa’alautele ‘ona laufanua na ‘āmata mai ai.  ‘E popole fo’i le fa’alāpotopotoga ‘i le va’aiga ‘o lāpisi ma otaota ‘o le ‘ā o’o ‘i ai, ‘ona ‘o Wānaka ‘o se ‘a’ai ‘e taulāmua ‘i le āga’i ‘i se tamāo’āiga ‘e lēai ni lāpisi.

Link to RNZ (Article) translated by Savelina Kasiano: https://www.rnz.co.nz/news/business/534705/council-to-weigh-pros-and-cons-in-stoush-over-mcdonald-s-in-wanaka

ATA: McDonald’s Wanaka / RNZ.