‘Ia fa’amālosi ātili le va’ava’aia lelei ‘o tagata ‘e iai mana’oga fa’apitoa

‘Ua vala’au le sui komesina ‘a le ‘au’aunaga ‘e puipuia aiā tatau ‘a tagata ‘e fa’aaogāina ‘au’aunaga mō le soifua mālōlōina ma ē ‘e iai mana’oga fa’apitoa, ‘ina ‘ia fa’amālosi ātili le va’ava’aiga ‘o ē ‘e iai mana’oga fa’apitoa ‘o lo’o tausia ‘i ‘āiga, talu ai na fa’aalia ‘i se līpoti, ni fa’afītāuli ‘e aofia ai le fa’aaogaga ‘oni ‘auala lē talafeagai.  ‘O se līpoti na saunia ‘e Rose Wall, sa tagataga’i ai ‘i ni fa’aseā se 363 na tu’uina atu ‘i le Komesina, ‘e uiga ‘i ‘au’aunaga fesoasoani mō tagata ‘e iai mana’oga fa’apitoa ‘o lo’o tausia ‘i āiga. 

‘E ese fa’afītāuli sā māua ai, ‘e aofia ai le fa’amālosi ‘ona tāofiofi, lē lelei le va’aiga ‘o ā lātou fuālā’au mō gasegase, lē lelei ‘ona pūleaina le tūlaga ‘o ō lātou soifua mālōlōina, ‘ae le’o mulimuli fo’i ‘i ta’iala ma fuafuaga ‘o fesoasoani ‘o lo’o lātou fa’atinoina.  ‘O se tasi ‘o fa’ata’ita’iga ‘o ia fa’alētonu, ‘o se taule’ale’a sa a’afia ‘i se gasegase ‘o le fai’ai, na maliu mai se manu’aga ‘i lona fai’ai, ‘ina ‘ua laoa ‘i sana taumafataga, talu ai sā lē fa’anini’ia lelei ana taumafa ‘e ui sā fa’amanino lelei ‘i le ta’iala ‘e ao ona faia mō lea taule’ale’a.  Sā tā’ua fo’i ‘i le līpoti, sā fefefe ‘i lātou ‘e tautatala, ‘ina ne’i feita ē ‘o lo’o tausia ‘i lātou, po’o le lē toe maua ‘e i lātou ‘o lea ‘au’aunaga. 

‘O se tasi ‘o fautuaga mai le līpoti ‘a Wall, ‘e tatau ‘i le Whaikaha, le Matāgāluega mō Tagata ‘e iai Mana’oga Fa’apitoa, ‘ona tāpena se fa’avae talafeagai, ‘e fa’atūlaga mai ai ni fuafuaga manino mō le tūlaga ‘e tatau ‘ona fa’atino ai le va’aiga ‘o ia tagata, ma fa’aleleia ai fo’i le tausiga ‘o i lātou fa’apea ma le faiga ‘o līpoti.

ATA: Antibiotics / RNZ.