Maliu le tagata ‘e to’atasi ‘ina ‘ua sa’e se va’a ‘i le taulaga ‘i Manukau ‘i le Aso Sā

‘E to’atasi le tagata na maliu ‘i le fa’alavelave lea na sa’e ai se va’a fāgota ‘i le taulaga ‘o Manukau ‘i le taeao ‘o le Aso Sā. Na fa’ailoa mai fo’i ‘e leoleo, ‘e toa’ono isi tagata sā iai ‘i totonu ‘o lea va’a sā mafai ‘ona fa’asaoina mai, ma sā feasoasoani ‘i ai le ‘aufaigāluega ‘a le ambulance ‘i le pitonu’u ‘o Huia. ‘O le vāega ‘o le puipuiga ‘o le gātaifale, le Coastguard mai Waiuku sā gālulue fa’atasi ai ma leoleo ma isi vāega lavea’i ‘e fesoasoani ‘i lenei fa’alavelave.

Na fa’aalia ‘e fa’apea, na tupu lenei fa’alavelave ‘i le ava ‘i le Manukau Bar, lea ‘e iloga ‘ona sousou ma galuā. ‘E lē ‘o se taimi muamua fo’i lenei ‘ua tupu ai se fa’alavelave ‘i lea ava, ma ‘ua fautuaina ai ‘e le Coastguard tautai ‘ina ‘ia fa’aeteete ‘i taimi ‘uma pe ‘ā uia, ‘ona ‘e faigatā ‘ona iloa ni fa’alavelave fa’apēnei ‘e ono tutupu mai ai.‘O le māsina ‘o ‘Aukuso na maliu ai fo’i le ‘si tagata ‘i lea lava vāega ‘o le gātaifale ‘o Manukau, ‘ina ‘ua fulifaō ai se va’a fāgota ‘i le mālolosi ‘o galu.

 Link to RNZ (Article) translated by Lauano Ilaoa: https://www.rnz.co.nz/news/national/531320/one-dead-after-boat-capsizes-on-manukau-bar

ATA: Coastguard – RNZ