Goto uga le $224,000 ‘a se tinā Taranaki ‘i faiga taufa’avalea ‘a le ai sā fa’aaogā ai le ata ‘o le ali’i Palemia ‘o Christopher Luxon.
‘E 72 tausaga ‘o se tinā mai Taranaki, ‘ua goto uga lana sēleni ‘e tusa ma le $224,000 afe Tālā, ‘i se faiga taufa’avalea na fa’aaogāina ai le atamai fa’afōliga, ‘o le AI po’o le Artificial Intelligence.‘O lenei tinā ‘e suafa ‘iā Jill Creasy, na se’etia ‘ina ‘ua matamata ‘i se ata video ‘o le ali’i palemia ‘o Christopher Luxon, ma sana tautalaga ‘e ūna’ia ai tagata ‘e fa’afaigāluega a lātou sēleni ‘i teugātupe ia ‘e tā’ua ‘o le cryptocurrency.‘O le tautalaga ‘a Luxon ‘e pei ‘ona maua ‘i lea ata video, ‘o lo’o fautuaina ai le ‘au mātutua ‘ua penisione ‘ina ‘ia ‘ave a lātou sēleni ‘e ‘inivesi ‘i le tupe lea ‘e fa’aigoaina ‘o le Bitcoin.
Peita’i, ‘o lea ata video ‘o le palemia, ‘o se ata na fausia ‘i le atamai fa’afōliga lea ‘e ta’ua ‘o le Artificial Intelligence, po’o le AI, ‘ae lē moni, ‘auā ‘e lē ‘o le ali’i palemia ‘o lo’o faia ai lea tautalaga.‘O isi foi video fa’apea ‘ua fa’asalalau nei ‘i feso’ota’iga televavave ‘i totonu ‘o Niu Sila, ‘e aofia ai se ata video ‘o le tama’ita’i fa’asalalau ‘o Jenny May Clarkson ‘o le TVNZ ma se ata ‘o le ali’i minisitā ‘o le Vā ‘i Fafo ‘o Vaovasamanaia Winston Peters, ‘o lo’o fautuaina ai tagata ‘ina ‘ia ‘inivesi a lātou tupe ‘i le mea lea ‘e tā’ua ‘o le cryptocurrency.
‘O le tinā matua ‘o Jill Creasy mai Taranaki, ‘ua na’o le to’atasi lea ‘o le to’atele ‘o isi tagata ‘ua āfāina ‘i itū’āiga ‘o faiga taufa’avalea fa’apēnei ‘e a’afia ai tupe ‘e fe’avea’i ‘i feso’ota’iga fa’atēkonolosi.‘O lo’o su’esu’eina ‘e leoleo le matā’upu lenei, ‘ae na fa’aalia ‘e itiiti le avanoa ‘e toe maua ai le sēleni ‘a lenei tinā ‘ua leiloa ‘ona ‘o faiga taufa’avalea ma le taufa’asesē ‘a tagata ‘o lo’o fa’apogai ai.‘Ua fautuaina ai le mamalu ‘o le atunu’u, ‘ina ‘ia matuā fa’aeteete ‘i mea fa’apēnei, ‘e fō’ia ai le āfāina ‘i ia itū’āiga ‘o fa’afītāuli.
Link to RNZ (Article) translated by Lauano Ilaoa: https://www.rnz.co.nz/news/national/531353/pensioner-loses-224k-after-being-tricked-by-ai-deepfake-christopher-luxon-cryptocurrency-investment-scam
ATA: RNZ