Gau kamupani ‘o uila ‘a le to’alua ‘o le faipule

‘Ua tōfia nisi ‘e fa’agaluea’ina ma sa’ili ni tupe ‘e totogi ai ‘aitālafu ‘a le pisinisi ‘o uila ‘eletise ‘a le to’alua ‘o le tama’ita’i faipule Darleen Tana, ‘i le aso lava lea na fa’alauiloa fa’alaua’itele ai le ‘oto’otoga po’o le aotelega ‘o le līpoti po’o ā vāega na ia silafiaina ‘e fa’atatau ‘i tu’ua’iga ‘i le fa’alētonu ‘o le va’aiga ‘o tagata mai fafo na faigāluega ‘i le pisinisi.  Na fa’aalia ‘i le resitala ‘o kamupanī Niu Sila, ‘ua iai fa’alāpotopotoga ‘ua filifilia ‘e pei ‘o Khov Jones ‘e va’aia le E Cycles NZ limited. 

‘O le to’alua ‘o Tana, ‘o Christian Hoff-Nielsen, na’o ia le fa’atonu sili ‘o le pisinisi ‘o lo’o lisiina ai.  ‘O le aso 23 Iulai ‘e tatau ‘ona maua ai le līpoti muamua ‘a le kamupanī.  Sā fa’asalalauina fo’i ‘i luga ‘o le TradeMe le isi fale’oloa ‘o le Bikes and Beyond ‘i Waiheke talu mai le aso 2 Iulai.  Sā fa’alauiloaina fa’alaua’itele ‘e le Vāega Fa’aupufai ‘a le Greens le aotelega ‘o le su’esu’ega ‘i vāega na silafia ‘e le faipule ‘e uiga ‘i tu’ua’iga ‘o le lē lelei ‘ona va’ai ‘o tagata faigāluega mai fafo ‘i le pisinisi ‘a lona to’alua.  Sā tā’ua ‘i le līpoti, ‘e fōliga mai na silafia ‘e le tama’ta’i faipule tu’ua’iga ‘ae na te le’i fa’ailoaina ‘i le Greens se fa’aseā ‘a se tasi na faigāluega ai ‘i le pisinisi ‘a lona to’alua. 

Na tete’e Tana ‘i le līpoti ma sā fa’amāvae mai le Vāega Fa’aupufai, peita’i ‘o lo’o mana’o le Greens ‘ina ‘ia fa’amāvae mai le Palemene.  Na saunoa le isi ta’ita’i ‘o le Green Chloe Swarbrick, ‘e tele avanoa sā tatau ‘ona fa’ailoa ai ‘e le faipule tu’ua’iga ogaoga nei, ‘ae sā ia lē tali sa’o ‘i fa’afesili, lea na ala ai ‘ona faia la lātou lava su’esu’ega.  ‘Ua manino ai nei le atunu’u ‘i le māfua’aga ‘ua ala ai ‘ona tutū fa’atasi le fa’afaletui ‘e talosaga ‘ina ‘ia fa’amāvae Tana mai le Palemene pei ‘ona saunoa Swarbrick.

ATA: RNZ.