Fuafuaina se fa’atasiga ‘e fa’alauiloa ai le ma’i suka (diabetes)

‘Ua fa’ailoa mai fuafuaga ‘a le Fa’alāpotopotoga mō le gasegase ‘o le suka, ‘e fa’aigoaina ‘o le Diabetes New Zealand, mō sa lātou taumafaiga fa’alaua’itele, ‘i le vāiaso nei, ‘e saga fa’alauiloa ātili ai lenei gasegase faigatā ‘o le ma’i suka ‘i totonu ‘o Niu Sila.   ‘Ua māfua lea ‘ona ‘e fa’apea, ‘ua atagia ‘i fa’amaumauga, le ono o’o atu ‘i se tūlaga mata’utia lenei gasegase ma le fa’atupula’ia pea ‘o tagata ‘e maua ai.

Na tā’ua ‘e le Fa’atonu ‘o le Diabetes New Zealand, ‘o Heather Verry, ‘o le fua fa’atatau ‘i ai, ‘e o’o atu ‘i le tausaga ‘e 2040, ‘ua silia ‘i le ‘afa miliona le aofa’i ‘o tagata ‘o Niu Sila ‘e maua ai ‘i le ma’i suka.  Na ia tā’ua ‘e fa’apea, ‘o le Resitara ‘o lo’o iai fa’amaumauga ‘o le Ma’i Suka, ‘ua iloa ai ‘e lata ‘i le 96,000 afe le aofa’i ‘o tagata na maua ‘i lenei gasegase ‘i totonu ‘o le tolu tausaga ‘ua tuana’i atu nei, ‘ua o’o atu ai le aofa’iga ‘o tagata ‘uma ‘e maua ‘i le suka ‘i le 324,000 afe.

‘O le tausaga ‘e 2021 sā valo’ia ai ‘e le Diabetes New Zealand, se si’itaga ‘i le vā ‘o le 70 ma le 90 pasene ‘o tagata ‘e maua ‘i lenei ma’i, mā ‘o fuainūmera ‘ua aliali mai nei, ‘e mautinoa ‘o le ‘ā o’o ‘i se tūlaga faigatā lenei ma’i ‘i totonu ‘o le atunu’u.

Sā fa’aalia mai lā ‘e le tama’ita’i fa’atonu ‘o le Diabetes New Zealand, ‘o le to’atele ‘o tagata lātou te lē silafia ‘e mafai ‘ona tāofi le ma’i suka lea ‘e tā’ua ‘o le diabetes type two pē fō’ia fo’i, ‘e ‘auala lea ‘i ni suiga ‘e faia ‘i le tausiga ‘o le soifuaga ‘i aso ta’itasi.  ‘O le Aso Faraile nei ‘e faatinoina ai se polokalame sa’ilitupe ‘a le Diabetes New Zealand, ‘i le fa’amoemoe ‘e saga fa’alauiloa ai ma silafia ‘e tagata tūlaga ‘uma ‘e tusa ‘o le gasegase ‘o le suka.  ‘Ua fa’aigoaina lea taumafaiga ‘o le Sneaker Friday, ‘o le fa’amoemoe ‘autū ‘ina ‘ia ūna’ia le to’atele ‘o tagata ‘e gaioi ma fa’amālositino ‘e pei ‘o le savali.

Link to RNZ (Article) translated by Lauano Ati Ilaoa: https://www.rnz.co.nz/news/national/533345/call-for-more-action-as-diabetes-numbers-exceed-300-000

ATA: LDR / Supplied. (RNZ)