Fuafua le mālō ‘e totogi tupe pe ‘ā asiasi ‘i paka tetele ma nofoaga mō fa’asao ‘i Niu Sila

‘O lo’o manatu le mālō ‘e fa’amoemoe ‘e ‘āmata ona totogi le tupe ‘e ulufale ai tagata ‘e fia asiasi ‘i paka ma nofoaga mō fa’asao ‘i le atunu’u, ‘ina ‘ia fa’afaigōfie ai ona fa’agaioi pisinisi tūma’oti. ‘Ua māe’a ona tu’uina mai ‘e le Matāgāluega ‘o Fa’asao ni pepa se lua mō fa’atalanoaga fa’alaua’itele ‘i le fa’afouga ‘o  fa’asao, ‘e sa’ili ai ni fa’amatalaga ‘i fesili ‘e pei ‘o ai ‘e tatau ona totogi le tupe mai ‘i  tagata asiasi ma po’o ā fo’i nofoaga ‘o le ‘ā mo’omia le totogi ‘o le tupe ‘e ulufale ai ‘auā asiasiga. Fa’aalia ‘e le Minisitā ‘o le Fa’asao, Tama Potaka, ‘o le sini ‘āutu ‘o lea fuafuaga, ina ‘ia fa’amautinoa ‘o puipuia nofoaga fa’alenātura ma ‘ia gafatia ‘e tūrisi le tau, fa’apea le fesoasoani ai ‘i le tamāo’āiga ‘o le atunu’u.

‘I le vā ‘o Iūlai 2023 ma Iūlai 2024, ‘o le aofaʻiga ‘o le pāketi ‘a le Matāgāluega mō fa’asao ‘e $644.2 miliona tālā, ‘e lē aofia ai le faʻatupega ‘o gāluega mō le fa’alenātura. ‘O le $233.1miliona tālā mai ‘i lea vaegātupe sa fa’aāogāina ‘e lagolago ai isi polokalame ma fa’atūmau ai isi vāega  ‘auā le fa’atōsinaina mai pea ‘o tagata asiasi, fa’apea le $315.7miliona tālā mō gāluega fa’aola. Na saunia ‘e le Mālō le tusa ma le 83 pasene ‘o le faʻatupega, ‘ae 17 pasene na maua mai ‘i isi punaoa ma isi fa’alāpotopotoga. Ma i le Aso 1 ‘o ‘Oketopa, na si’itia ai le lāfoga ‘o le International Visitor Levy mai le $35 ‘i le $100 ‘i le tagata, peita’i ‘i lea taimi, ‘e le’i mafai ‘e le ‘ōfisa ‘a Potaka ona fa’amautū mai pe ō le ‘ā tutusa tupe maua ‘i le vā o le fa’asao ma tūrisi, ‘e pei ona sā ‘i ai ‘i aso ‘ua mavae. Na fa’alauiloa mai ‘e le DOC ‘i le Aso Lulu, ‘i le ‘āmata tāpā ‘o tupe e totogi pe ‘ā asiasi ‘i Punakaiki Pancake Rocks, Franz Josef Glacier, ma le White Horse Hill i Aoraki Mount Cook National Park.

’O lo’o tatala avanoa mō manatu fa’aalia ‘i luga ‘o le ‘upega tafa’ilagi ‘a le Matāgāluega mō Fa’asao, ma ‘e tāpunia fa’atalatalanoaga fa’alaua’itele ‘iā Fepuari ‘o le tausaga fou. 

Link to RNZ (Article) translated by Anna Fa’asolo: https://www.rnz.co.nz/news/national/526894/tourists-will-have-to-pay-100-to-enter-nz

ATA: Liu Chen/RNZ