Fono Qiulae Wong ma Chris Hipkins

‘Ua māe’a ‘ona feiloa’i atu le ta’ita’i ‘o le Opportunity Party Qiulae Wong ‘i le ta’ita’i ‘o le Labour Chirs Hipkins, ‘a’o tatālia ‘e ta’ita’i le fa’ai’uga mulimuli ‘o le pālota ‘e ala ‘i pālota fa’apitoa.  Na fa’ailoa fo’i ‘i līpoti, ‘ua māe’a ‘ona feiloa’i atu Qiulae ‘i le ta’ita’i ‘o le National Tuisinavemaulumotootua Christopher Luxon, ‘e ui ‘e lē tasi le taimi na saunoa ai Luxon ‘a’o le’i faia le pālota, ‘e lēai se avanoa ‘e gālulue fa’atasi ai ma le Opportunity.  Peita’i na saunoa ‘i le Aso Gafua, ‘o se feiloa’iga na matuā sōloga lelei..

Na tā’ua ‘e se so’o’upu ‘a le Opportunity ‘i le Leitiō Niu Sila, na talanoa Hipkins ma Qiulae ‘e uiga ‘i fa’atōsina na fa’agāsolo ‘o le pālota fa’apea ai ma le fa’anaunauta’iga ‘o tagata ‘uma ‘ina ‘ia gālulue fa’atasi ma fa‘atūmauina se si’osi’omaga lelei ma le fealofani. 

Na fa’aalia ‘e Wong ‘i le Aso Gafua, ‘e mana’o ‘e feiloa’i atu ‘i ta’ita’i ‘o vāega fa’a’upufai ‘uma, ‘peita’i, ‘e lēai se fa’amoemoe ‘e faia ni fa’atalanoaga se’i fa’atali se’i māe’a le faitauga mulimuli ‘o le faigāpālota.   ‘O anapō lea na fuafua ‘e feiloa’i atu ai ‘i le ta’ita’i ‘o le Greens, Chloe Swarbrick.   Sā maua le avanoa ‘e talanoa ai ma ni sui ‘o le Te Pati Māori ‘i fafo ‘o se fale toleni ‘i le Aso Lua ‘e tusa ai ma līpoti.  Na fa’aalia ‘e le so’o’upu ‘a le vāega fa’a’upufai, ‘e le’i maua atu se tala mai le ta’ita’i ‘o le New Zealand First, Vaovasamanaia Winston Peters fa’apea ai ma le ta’ita’i ‘o le ACT, David Seymour.

Link to RNZ (Article): https://www.rnz.co.nz/news/politics/2504189/opportunity-s-qiulae-wong-meets-with-chris-hipkins

IMAGE/ATA: RNZ / Mark Papalii