Fono ‘a le Wellington Region Media ma le WREMO ma le NEMA

‘O le Aso Faraile talu ai na fa’ataunu’uina ai se fono ‘a fa’alāpotopotoga ‘o fa’asalalauga ‘aemaise ‘o leitiō fa’atasi ai ma le Pūlega ‘o fa’amatalaga mō le atunu’u pei ‘ona vala’auina ai ‘e le ‘Ōfisa fa’aitūmālo Uēligitone ‘e nafa ma fa’alavelave tetele fa’afuase’i, ‘aemaise ‘o le Lālā ‘a le Malo ‘e va’aia matā’upu tau ‘i fa’alavelave tetele fa’afuase’i ‘e pei ‘o fa’alavelave fa’alenātura. 

‘O le ‘auga ‘o lea fono, ‘o le tu’ufa’atasiga ‘o pūlega ‘o lo’o mata’itūina le puipuiga lautele ‘o le atunu’u mai fa’alavelave fa’afuase’i, ‘e talanoa fa’atasi ma fa’alapotopotoga fa’asalalau ‘e fa’asoa ‘iā lātou gāluega ‘i taimi ‘e tutupu mai ai ia tūlaga.  Sā fa’apitoa lava le mata’ituga ‘i fa’asalalauga ‘i leitiō, ‘o le ālā leo muamua ma le ‘autū lea ‘e ‘auala atu ai fa’amatalaga mō le atunu’u lautele, ‘e tali ai ‘i se fa’alavelave telē lava ‘e a’afia ai le atunu’u.  ‘E le’o mafai ‘ona fa’alaua’itele au’ili’iliga ‘o lea fono ‘e tusa ai ma aiāiga ‘a le pūlega na fa’atautaia lea feiloa’iga. 

‘O le vaiaso nei, ‘o lo’o fa’atāuaina ai le Get Ready Week 2024, po’o le nofo sāuniuni ‘āmata mai le Aso Gafua ‘e o’o atu ‘i le Aso 25, le Aso Faraile.  Mā ‘o lo’o fa’a’autū tonu lava lenei fa’atāua ‘i le fa’ata’ita’iga ‘a le atunu’u, ‘i le gāioiga ‘e tatau ‘ona fai pe ‘ā lūlū se mafui’e tele ma se tsunami, le ShakeOut.  ‘O le Aso Gafua sā fa’atāuaina ai le lava tāpena ‘o le ‘āiga.  ‘O le Aso Lua, ‘o le tāpena ‘o fale faigāluega, Aso Lulu, Nofo sāuniuni ‘o ā’oga, a’o le Aso Tofi ‘e fa’atino ai gāioiga pe ‘ā lūlū se mafui’e tele ma se tsunami.  ‘O lo’o mafai ‘ona maua ia fa’amatalaga ‘uma ‘i luga ‘o le ‘upega tafa’ilagi ‘a le WREMO.

Sāmoa Capital Radio (Article) by Savelina Kasiano

Ata: Wellington Region Emergency Management Office