Folafola ‘e le National le vavae ‘o le Foodstuffs

‘Ua folafola ‘e le vāega fa’a’upufai ‘a le National, le vavae ‘o supamāketi, ‘e pei ‘o le Pak’nSave mai le New World, ‘i se taumafaiga ‘e tu’uitīitia ai tau ‘o ‘oloa, ma ‘o se tasi lea ‘o vāega ‘autū ‘o la lātou fa’atōsina ‘o le faigāpālota.  Na fa’asilasilaina lea pōlisi ‘i le taeao ‘o le Aso Lulu, ma ‘ua folasia ‘i le taimi ‘ua fa’ailoa ai fo’i ‘e le Labour la lātou fuafuaga ‘e fa’asāina ai kamupanī tetele mai le faia ‘o ni tau taugatā ‘o ‘oloa.

‘O le fuafuaga ‘a le National, ‘o le ‘ā tā vavae ‘ese ai lava ‘ia supamāketi ta’itasi, le Pak’nSave, New World/Four Square ma le Woolworths. 

Peita’i ‘e fa’alagolago lea, ‘i se iloiloga ‘e fa’atinoina ‘i totonu ‘o māsina ‘e 6, ‘a le Commerce Commission, ‘ina ‘ia iloilo pē ‘o le ‘ā maua ‘e tagata fa’atau ni fa’amanuiaga pe ‘ā vaevae le kamupanī.

Na fa’ailoa ‘e le National ‘ā fai ‘e fa’amaonia ‘e le Komisi le fuafuaga, ‘o le ā ‘o lātou faia loa se tūlāfono ‘e fa’amālosia ai le vaevaega ‘o le kamupanī.

Na saunoa le so’oupu ‘a le National mō matā’upu tau tupe, Nicola Willis, ‘e fa’apea ‘e ono mafai ‘e lenei suiga ‘ona fa’asaoina ai tupe ‘a ‘āiga ‘e o’o atu ‘i le $1,320 ‘i le tausaga, mā ‘e ono fa’aitīitia ai tau ‘o ‘oloa ‘o taumafa ‘i le tusa ma le 5 pasene, pe ‘ā fa’atusatusa ‘i le tūlaga semanū ‘e o’o ‘i ai pe’ ana lēai lea suiga.

‘O ia fuainūmera ‘e mai se iloiloga na fa’atonuina ‘e le mālō mō tau ‘o ‘oloa ma ‘au’aunaga fa’apea ma penefiti, lea fo’i na fa’alauiloaina ‘i le aso ananafi.

Link to RNZ (Article): https://www.rnz.co.nz/news/politics_election-2026/1410766/national-vows-to-pursue-break-up-of-supermarket-giant-foodstuffs

IMAGE/ATA: RNZ / Samuel Rillstone