Folafola ‘e le Minisitā ‘o le Puipuiga ‘a Niu Sila le su’esu’ega fa’a-le-fa’amasinoga ‘i le fa’alavelave ‘ua goto ai ‘i Sāmoa le ‘o le HMNZS Manawanui
‘Ua folafola ‘e le Minisitā ‘o le Puipuiga ‘a Niu Sila, ‘o Judith Collins, le faia lea ‘o se su’esu’ega fa’a-le-fa’amasinoga, ‘i le fa’alavelave ‘ua goto ai ‘i Sāmoa le va’a su’esu’e ‘o le gātaifale ‘a le Navy, ‘e igoa ‘o le HMNZS Manawanui.
‘O lea tūlaga na fa’ailoa mai fa’alaua’itele ‘e Collins, ma le ta’ita’i’au ‘o le Navy, le ali’i Atimalala ‘o Garin Golding, ‘i se feiloa’iga ma le ‘au tusitala ‘i le nofoaga tūtotonu ‘o le fuāva’a ‘a Niu Sila ‘i Devonport.
Na fa’aalia ai ‘e le tama’ita’i Minisitā, ‘o lenei fa’alavelave, “’O se aso fa’avauvau tele mō le Navy ‘a Niu Sila.
Na ia tā’ua ai, ‘o le agaga ‘o le su’esu’ega, ‘o le ‘a faia, ‘ina ‘ia iloa tonu ai le fa’afitāuli mā le mafua’aga ‘o le mea na tupu ‘i le va’a, ‘ae ‘o le fa’amuamua ‘o lea ‘ua ‘ave ‘i le tu’uitiitia ‘o le ono fa’aleagaina ‘o le sami mā le si’osi’omaga, ma le fa’asaoina mai ‘o ni mea aogā mai lenei va’a, pē ‘afai ‘e mafai.
Na tupu lenei fa’alavelave ‘i gātaifale ‘o le afio’aga ‘o Siumu ‘i le talafātai ‘i saute ‘o ‘Upolu ‘i le afiafi ‘o le aso to’ona’i ma sā mafai ‘ona fa’asaoina mai ‘e le ‘Ofisa ‘o Leoleo mā le vāega ‘o le Tineimū ‘a Sāmoa, le auva’a ‘atoa ‘e to’a 75 ‘o lenei va’a.
‘O le pō ‘anapō na tu’ua ai ‘Aukilani ‘e se va’alele tele ‘o le Mālō Niu Sila mō Sāmoa, mo le ‘aumaia ‘o le ‘auva’a ‘o le va’a na a’afia.
‘O le va’a lenei, ‘o le Manawanui, ‘o se va’asu’esu’e ‘o le gātaifale ‘a le Navy ‘a le Mālō Niu Sila ‘e silia ‘i le $103-miliona tālā le tau na fausia ai ma ‘amata fa’aaogaina ai ‘i le māsina ‘o Nōvema ‘i le tausaga ‘e 2019.
‘O le Aso 29 ‘o Sētema na tu’ua ai ‘Aukilani ‘e le Manawanui mō lana malaga lona tolu ‘i atumotu ‘o le pāsefika mā ‘e tupu ai nei le fa’alavelave, a’o feagai mā ni su’esu’ega ‘i le gātaifale mā le ā’au ‘i lea vāega ‘o Sāmoa.
Link to NZHerald (Article) translated by Lauano Ati Ilaoa: https://www.nzherald.co.nz/nz/hmnzs-manawanui-on-fire-and-tilting-badly-after-it-ran-aground-off-the-coast-of-samoa-last-night/44PLWNBV6RBVJHLVHARNGMOUKU/
ATA: Defence Minister Judith Collins and Chief of Navy Rear Admiral Garin Golding fronted a media conference in Auckland on Sunday on the sinking of HMNZS Manawanui off the coast of southern Samoa. Alex Burton / NZHerald.