Folafola e le Leipa e lātou te lē si’itiaina le lāfoga mō le suāu’u ‘i le paea’iga ‘atoa pe ‘ā manumālō i le pālota

‘Ua ta’utino le Vāega Fa’a’upufai ‘a le Leipa, ‘afai ‘ae tūla’i mai e tau’ave le mālō ‘i le isi paea’iga, ‘o le ‘ā lēai se si’itaga ‘i lāfoga o suāu’u i totonu o le paea’iga ‘atoa. ‘Ua vala’au le Leipa ‘i le faigāmālō so’ofa’atasi ‘ina ‘ia fa’alēaogāina le si’itaga ua fuafua ‘e ‘amata i le tausaga fou. Peita’i, ua tā’ua e le Minisitā o Tupe, ua toetiti lava mautinoa se fa’ai’uga ‘e fa’atatau o lea matā’upu.

‘O lo’o fuafua e si’itia le lāfoga o suāu’u ‘i le 12sene i le lita mai iā Ianuari, soso’o ai ma le 6 sene ‘i le lita ‘i le 2028, ma le 4 sene ‘i le lita ‘i tausaga ta’itasi mulimuli ane. ‘I le fa’agāsologa o polokalame a le faigāmālō so’ofa’atasi ‘i lenei tausaga, sa fa’aalia ai le lē naunau o le mālō ‘e fa’atino le si’itaga ua fuafua mō Ianuari, ona ‘o tūlaga faigatā o lo’o ‘iai nei ‘i le tau ma le sapalai o suāu’u.

‘Ua lata ona faia ‘e le Kapeneta se fa’ai’uga pe fa’alēaogāina lea si’itaga ua fuafuaina. Sa vala’au muamua le ta’ita’i o le Leipa Chris Hipkins i le mālō, ‘ina’ia fa’alēaogāina lea si’itaga. Peita’i, i le Aso Tofi na ia fa’ailoa ai, ‘afai ‘e sē’ei mai le Leipa i le nofoa, ‘o le lē faia nei si’itaga. ‘E talitonu le Leipa, e matuā lē gafatia e tagata Niu Sila le toe fa’aopoopo o le 22sene ‘i le lita mō le suāu’u ‘i taimi uma e fa’atumu ai ā lātou ta’avale.

Link to RNZ (Article): https://www.rnz.co.nz/news/politics_election-2026/1152768/labour-promises-not-to-increase-fuel-excise-for-a-full-term

IMAGE/ATA: RNZ / Baz Macdonald