Filifilia se Ta’ita’ifono fou ‘o le Komisi ‘o Gāluega ‘a le Mālō Niu Sila

‘Ua fa’ailoa mai ‘e le palemia ‘iā Christopher Luxon, le filifilia ai ‘e le faigāmālō, ‘o le ali’i ‘o Sir Brian Roche, ‘e ‘avea ma Komesina Fou ‘o Gāluega ‘a le Mālō Niu Sila.  ‘O lea fa’ai’uga ‘ua faia ‘ina ‘ua mavae le 13 māsina talu ‘ona mālōlō lītaea mai lea tofiga, le ali’i ‘o Peter Hughes sā galue ai mō tausaga ‘e tele.

‘E lua tausaga, valu māsina le ‘umi ‘o le ‘ā galue ai Sir Brian ‘i lea tofiga, ‘e ‘āmata ‘i le aso 4 ‘o Nōvema.

Na fa’aalia ai ‘e le ali’i palemia, ‘o Sir Brian ‘o se tasi ‘o ta’ita’i ‘ua tele matāgāluega ma fa’alāpotopotoga ‘a le Mālō ‘ae fa’apea fo’i ma pisinisi tūma’oti, ‘ua galue ai, mā ‘e tele ona tomai ma agava’a mō le saga fa’aleleia ai ‘o ‘au’aunaga ‘a le ‘aufaigāluega ‘a le mālō.

‘O Sir Brian ‘o le ta’ita’ifono muamua lea ‘o le Pūlega ‘o ‘Auala Tetele ‘o le Itūmālō ‘Aukilani,fa’apea ai ma le Matāgāluega ‘o ‘Auala ‘o Fela’ua’iga ‘a le Mālō Niu Sila, ma sā galue fo’i mō le Komiti Fa’afoe ‘o Falema’i ‘o le itūmālō Hawkes Bay, ‘ae fitu tausaga na ‘āvea ai ma pule sili ‘o le Fa’alāpotopotoga ‘o Falemeli ‘a Niu Sila, le NZ Post.

Link to RNZ (Article) translated by Lauano Ilaoa: https://www.rnz.co.nz/news/political/530720/sir-brian-roche-named-as-new-public-service-commissioner

ATA: RNZ