Filifilia mō le taimi muamua se tama’ita’i ‘e ‘avea ma Komesina ‘o Leoleo, ‘i se taimi lē tūmau

‘Ua tōfia le sui ta’ita’i komesina, Tania Kura, mō se taimi lē tūmau ‘i le Komesina ‘o Leoleo, ‘a’o sa’ili ai ‘e le mālō se tasi ‘e avea ma fa’aulūuluga fou.  ‘O le māsina fou, ‘e fa’ase’e ‘ese ai le Komesina Andrew Coster, mā ‘e ono māsina ‘o le ‘ā vave māe’a ai lana tautua, ‘ae ta’ita’i ‘i le Fa’alāpotopotoga fou ‘o le Social Investment Agency.  ‘I se pepa  ‘o fa’amatalaga ‘i le Aso Lua, na fa’ailoa ai ‘e le Minisitā ‘o Leoleo, Mark Mitchell, ‘o le Aso 11 Nōvema, ‘o le ‘ā ‘āmata se’ei ane ai Kura ‘i le tofiga ‘o le Komesina ‘o Leoleo se’ia maua se sui tūmau mō lea gāluega.  ‘Ua fa’amauina ai le ulua’i taimi ‘ua tōfia ai se tama’ita’i ‘i lea tofiga ‘i totonu ‘o Niu Sila ‘e ui ‘o se tofiga lē tūmau.

‘O le minisitā ma le Palemia Christopher Luxon ‘e fa’atūina atu se ta’ita’i fou pe ‘ā mae’a le gāluega ma su’esu’ega ‘a le Komisi mō ‘Au’aunaga ‘a le Mālō po’o le Public Service Commission, ‘ona filifili loa lea ‘e le Kōvana Sili, le tagata ‘o le ‘ā fa’amanuiaina.  ‘O le tausaga ‘e 2020, na ‘avea ai Kura ma tama’ita’i leoleo muamua ‘e filifilia ‘i le sui komesina.  Talu ai nei, sā ‘avea ai ma fa’aulūulūga ‘o gāluega ‘a leoleo ‘o lo’o fesāga’i ma tagata lautele, va’aia su’esu’ega ma gāluega fa’atino ‘i aso ta’itasi ‘a leoleo, ‘i itūmālō ‘uma ‘e 12.  ‘O Tēsema ‘i le tausaga talu ai ‘ina ‘ua fa’ato’ā tōfia Mitchell ‘e ‘avea ma minisitā ‘o leoleo, na ia tu’uina atu ai se tusi ‘o vāega ‘e tatau ‘i le komesina ‘ona ‘ausia, ma sā fa’atuai fo’i ‘ona ia fa’alauiloa lona fa’atuatuaina ‘o le komesina.

 Link to RNZ (article) translated by Savelina Kasiano: https://www.rnz.co.nz/news/national/532187/first-ever-female-police-commissioner-appointed-on-an-interim-basis

Ata: RNZ / Anusha Bradly