Fesiligia le vaegātupe $2.7-piliona ‘ua fa’aagaga mō polokalame ‘e a’oa’oina ‘i totonu ‘o Iunivesitē

‘E $2.7-Piliona Tālā le vaegātupe na fa’a-agaga ‘e le faigāmālō mō polokalame ‘e a’oa’oina ‘i totonu ‘o iunivesitē ma ā’oga maualuluga ‘i le tausaga lenei, peita’i, ‘o lea ‘ua aliali mai le ono lē lava ‘o lea sēleni ‘e fa’amalieina ai le tūlaga to’atele ‘o tagata ‘ua ‘ulufale atu mō a’oa’oga maualuluga ‘i itū ‘ese’ese ‘o le atunu’u.

‘Ua fa’aalia mai ‘i se līpoti ‘a le Uaeālesi Fa’asalalau ‘a Niu Sila, ‘o le tele lava ‘o Iunivesitē ma a’oa’oga maualuluga ‘ua si’itia le aofa’i ‘o tama ma teine ā’oga ‘ua talia ‘e ulufale atu ‘i ai ‘i lenei tausaga.

‘O le Iunivesitē ‘o Canterbury fa’apea ai ma le Iunivesitē ‘o ‘Aukilani, na līpotia mai ai le lata atu ‘i le valu pasene ‘ua si’itia ai le aofa’i ‘o tagata ‘ua talia ai mō a’oa’oga ‘i lenei tausaga ‘ua ‘āmatalia.  Sā tā’ua ai ‘e le Fa’atonu ‘o le mafutaga ‘a Iunivesitē ‘o Iuni ‘o Niu Sila, ‘o Chris Whelan, ‘o lo’o iai le popōlega ‘o sui ‘āuai, ‘i le lē lava ‘o le sēleni ‘e lagolago ai ‘e le Kōmisi ‘o A’oa’oga Maualuluga (Tertiary Education Commission), ‘ia le si’itaga ‘e pei ‘ona tūla’i mai nei ‘i le aofa’iga ‘o tama ma teine ā’oga ‘ua talia mō polokalame’ o lenei tausaga.

‘O le tausaga talu ai sā fa’atūlaga ai se māliega ‘i le vā ‘o le kōmisi ma le mafutaga ‘o iunivesitē, ‘i le aofa’iga ‘o tamaiti ā’oga ‘o le ‘ā fesoasoani ‘i ai ‘ātoa ma matā’upu ‘o le ‘ā su’esu’e ai ‘i le tausaga nei. Na fa’ailoa mai ‘e le komisi, ‘e $2.7-Piliona Tālā le vaegātupe ‘ua fa’a-agaga ‘e fesoasoani ma lagolago ai mō matā’upu a’oa’oina ‘i le level 3 ma luga atu, ‘e aofia ai ma polokalame fa’alea’oa’oga mō matātā ‘ese’ese.

‘O le tausaga lenei ‘o le tau mō tamaiti ā’oga ‘e su’esu’e ‘i matā’upu ‘o le Arts mō fa’ailoga tikerī, ‘e o’o ‘i le $7563 tālā le tupe ‘e mafai ‘ona fesoasani ‘i ai le komisi ‘i le tau ‘o a lātou su’esu’ega, ‘ae totogi ‘e lātou le pāleni ‘i le vā ‘o le $6,594 ma le $7,607 tālā.

Link to RNZ (Article) translated: https://www.rnz.co.nz/news/political/545768/will-the-2-point-7b-cost-of-tertiary-courses-be-enough

ATA: RNZ / Marika Khabazi