Fautuaina le faitau lelei ‘o fa’amatalaga ‘o ‘inisiua ‘ona ‘ua tele fa’aseā

‘Ua fa’aalia ‘e le ‘ōfisa ‘o sulufa’iga mō matā’upu tau tupe, ‘o fa’afītāuli ‘i le soifua mālōlōina lautele fa’apea ai ma le si’itia ‘o tau, ‘o māfua’aga ia ‘o le alu ‘i luga ‘o le nūmera ‘o fa’aseā ‘i le lē taliaina ‘o talosaga ‘i ‘inisiua ‘e totogi atu tupe, ma ‘ua fa’amālosi’au ai le ‘ōfisa ‘i tagata ‘uma ‘e fai ‘inisiua, ‘ina ‘ia faitau lelei ma manino ‘i fa’amatalaga nini’i ‘o lo’o i totonu ‘o a lātou pōlisi mō ‘inisiua.

‘E 91 pasene ‘ua si’itia ai le aofa’iga ‘o fa’aseā na tu’uina atu mō ‘inisiua ‘o le soifua mālōlōina ‘i le ‘ōfisa mō sulufa’iga mō tupe, mō le taimi muamua ‘i le tausaga ‘e o’o mai ‘iā Iuni, ma ‘ua pito maualuga ai fa’aseā mō ‘inisiua ‘o le soifua mālōlōina.

‘O se tasi ‘o māfuaʻaga ‘ua fa’aopoopoina ai fe’ese’eseaʻiga ‘e fa’atatau ‘i ‘inisiua tau soifua mālōlōina, ‘ona ‘o le fa’aaogā ‘e kamupanī ‘inisiua ‘o nisi ‘o aiaiga ‘i totonu ‘o konekarate, lea ‘e mafai ai ‘ona lātou fa’atapula’a le aofaʻiga ‘o tupe lātou te totōgia mō se talosaga, ‘e tusa ai ma le aofaʻiga lātou te manatu ‘e “talafeagai”.

Na tā‘ua ‘e Karen Stevens, le Insurance and Financial Services Ombudsman (‘Ōfisa Tūto‘atasi ‘e Iloiloina Faitioga ‘e uiga ‘i ‘Inisiua ma ‘Au’aunaga Tau Tupe), ‘i le polokalame Nine to Noon, ‘o le si’itia ‘o le nūmera ‘o faitioga, ‘e māfua ‘ona ‘o le to‘atele ‘o tagata ‘ua feagai ma faigatā tau tupe, fa’apea foʻi ma fa’afītāuli ‘o lo’o feagai ma le faiga ‘o ‘au’aunaga tau soifua mālōlōina ‘a le Mālō.

Na ia saunoa, ‘e māfua ‘ona ‘o le mānana‘o ‘o tagata ‘ia iai ni a lātou filifiliga. Peita’i, ‘ua ātili ai ‘ona fa’atapula‘a aiaiga ‘o inisiua tau soifua mālōlōina pe ‘ā fa’atusatusa ‘i mea sā māsani ai ‘i aso ‘ua mavae.”

‘Ua fa’aopoopoina le aofa’iga ‘o tagata ‘e fa’aseā ‘ona lātou te totōgia le ‘ēse’esega ‘i le vā ‘o le tau ‘e fa’atonuina ‘i lātou ‘e fōma’i mō ta’otoga ‘e totogi, ma le tau ‘e totogi ‘e le ‘inisiua.   ‘O le tele ‘o tagata ‘e lē faitauina a lātou pōlisi pei ‘ona saunoa Stevens.  ‘E tele fa’amatalaga lāiti ‘uma ‘e ao ‘ona faitau lelei.

Link to RNZ (Article): https://www.rnz.co.nz/news/health/1643899/health-insurance-customers-urged-to-read-the-fine-print-as-complaints-soar

IMAGE/ATA: SCR (file).