Fautuaga mō tagata ‘o Dunedin ‘i le tuana’i ai ‘o lōlōga ma tāfega mamafa

‘Ua fautuaina ‘e le pūlega ‘o le ‘a’ai ‘o Dunedin, tagata ‘i pitonu’u ‘e aofia ai le West Harbour, ma le Otago Peninsula mai Rotary Park ‘e o’o atu ‘i Portabello, ‘ina ‘ia taumafai ‘e fa’asao le suāvai. ‘Ua fa’apea fo’i ‘ona tau fa’asoasoa le suāvai taumafa ‘i isi vāega ‘e iai Outram ma Waikouaiti, ‘e aofia ai Karitane ma Hawkesbury.

‘E lē gata ‘i lea, ‘ae ‘ua fautuaina tagata ‘e nonofo ‘i West Harbour mai Ravensbourne āga’i ane ‘i Deborah Bay, ‘ina ‘ia fa’apuna muamua le suāvai ‘a’o le’i fa’aaogāina.

‘Ua iai fo’i ta’avale vai ‘ua fa’aaogāina ‘e tiliva atu ai le suāvai mō isi vāega ‘o lo’o mana’omia ai le suāvai ‘i le taimi nei.

‘Ae ‘o lo’o fa’apea fo’i ‘ona fautuaina tagata ‘i le ‘a’ai ‘o Dunedin, ‘ina ‘ia fa’aeteete ‘i le tagofia ‘o taga oneone ia sā fa’aaogā ‘e puipui ai le o’o atu ‘o tāfega ma lōloga ‘i o lātou fale. ‘I le ‘āmatalia ai ‘o gāluega ‘i le tau fa’amamāina ‘o mea sā lōfia ‘i lōloga ma tāfega ‘ona ‘o tīmuga mamafa sā feagai ai ma lea vāega ‘o le atunu’u.

‘E iva le aofa’iga ‘o fale ‘o ‘āiga ‘ua matuā fa’aleagaina lava ma ‘ua ‘ave ‘i ai le sticker mūmū ‘e fa’amautūina ai ‘ua lē talafeagai ‘ona toe nonofo ai nisi, ‘ae 20 le aofa’iga ‘o ‘auala ‘i totonu lava ‘o lenei vāega ‘o Niu Sila, ‘o lo’o tāpunia pea ‘ona ‘o ‘ele’ele ‘ua solo ma mea na fa’aleagaina ‘i tāfega ‘i aso soso’o ‘e lua. Peita’i, ‘o le ‘auala tele nūmera 88 ‘āga’i ‘i le taulaga ‘i Port Chalmers sā fuafua ‘e tatau ‘ona toe tatala ‘i le asō mō femalāgā’iga māsani.

ATA: RNZ.