Fautuaga mai le ‘ōfisa ‘o leoleo ‘e uiga ‘i fale fou lāiti po’o tiny homes scams

‘Ua tu’uina mai se lapata’iga fa’alaua’itele ‘a le ‘Ōfisa ‘o Leoleo, mō le mamalu ‘o le atunu’u ‘e tusa ‘o ni faiga taufa’asesē po’o ni scams ‘e a’afia ai le fa’atauina ‘o ni fale fou lāiti, ia ‘e tā’ua ‘o tiny homes.

‘Ua fautuaina mai ai ‘e se tasi ‘e mālamalama lelei ‘i itū’āiga ‘o fale nei, ‘ina ‘ia ‘aua ne’i se’etia gōfie ‘i fefa’ataua’iga ‘i luga ‘o le Facebook Martketplace, ‘ona ‘o le tele ‘o le mau faiga solitūlāfono ma le taufa’avalea ‘o lo’o mātauina ai ‘i lenei vaitaimi.  ‘O le Aso Faraile lea na fa’ailoa mai ai ‘e le ‘ōfisa ‘o leoleo, ‘e fa’apea, ‘o tagata ‘i le itūmālō ‘o le Hawkes Bay, ‘o lo’o tele ‘ina āfāina ‘i faiga taufa’asesē nei ‘i le Facebook Marketplace, lea ‘e a’afia ai le fia fa’atauina ‘o ni fale ia ‘e tā’ua ‘o tiny homes, fa’apea ni containers ‘ātoa ai ma fale ‘e faigōfie ‘ona fe’avea’i po’o portable cabin homes.

Na fa’aalia ‘e leoleo, ‘e to’atele tagata ‘ua āfāina ma gau ai a lātou tupe ‘i nei faiga taufa’asesē, ‘e ‘auala ‘i le totōgiga ‘o deposits po’o le tau ‘ātoa fo’i ‘o se fale ma se container po’o se cabin home.  ‘E iai le tagata ‘ua alu ai lana sēleni ‘e $10,000 afe Tālā le aofa’i, ma fa’apea fo’i nisi tagata ‘ua goto ai le faitau afe tālā ‘o ā lātou tupe.  Sā fa’amanino mai ‘e leoleo, ‘o le tele ‘o matā’upu nei ‘e fa’apogai ai tagata ‘i atunu’u ‘i fafo, ma ‘e faigatā ai ‘i leoleo ‘ona taumafai ‘e toe fa’afo’i mai tupe ‘ua totogi atu ‘i ai ‘e tagata mai Niu Sila nei.

Na fa’ailoa mai ‘e le fa’atonu ‘o le kamupanī ‘e igoa ‘o le Tiny House Hub, le tama’ita’i ‘o Sharla May, ‘e matuā atamamai tele tagata ‘o lo’o fa’apogai ‘i nei itū’āiga ‘o faiva ma ‘e matuā tatau ‘i so’o se tasi ‘e āfāina ai ‘ona  lipotia ma fa’ailoa ia fa’alētonu, ‘ina ‘ia mafai ‘ona silafia ai ‘e isi tagata ma puipuia ai le gau ma le alu lē aogā ai ‘o le mālosi ‘i mea fa’apēnei.

Link to RNZ (Article) translated by Lauano Ati Ilaoa: https://www.rnz.co.nz/news/business/534627/tiny-home-scams-how-to-keep-yourself-safe

ATA: RNZ.