Falepuipui se taule’ale’a ‘i lona fa’aaogāina ‘o se 3d printer ‘e fausia ai ni ‘au’upega mālolosi (fana)

‘O se taule’ale’a mai le itūmālō ‘o Otago, ‘o le tagata muamua lea ‘ua falepuipui ‘i totonu ‘o Niu Sila nei, ‘i lona fausia ‘o ni ‘au’upega mālolosi po’o ni fana, ‘e fa’aaogāina ai le masini ‘e lolomi ai ata ‘o mea, ‘e tā’ua ‘o le 3-D Printer.

‘E ono (6), le aofa’iga ‘o ni fana na fausia ‘e lenei ali’i ‘e igoa ‘iā Mathew Bryan McLaren, 31 tausaga ‘o le soifua.

‘O le vāiaso na te’a nei na tūla’i ai ‘o ia ‘i luma ‘o le Fa’amasinoga  Fa’aitūmālō ‘i Oamaru, ma ‘ua fa’asalaina ai ‘o ia ‘i le 26 māsina ‘i le falepuipui.  ‘E fā moliaga na ‘ioeina ‘e lenei taule’ale’a, ‘e aofia ai le mōliaga ‘o lona fausia lea ‘o ni fana se lima na ia lolomiina, ‘i lana 3-D Printer, ‘i le vā ‘o Iuni ‘o le tausaga ‘e 2022 ma Iuni ‘o le tausaga nei.

‘O le tausaga ‘e 2020 na pāsia ai se Tūlāfono fou ‘ua fa’asā ai ‘ona fausia ‘ese tagata se ‘au’upega mālosi  ma ‘e mafai ‘ona falepuipui ai se tasi ‘i le sefulu tausaga pe ‘ā fa’amaonia ai sana solitūlāfono.

Link to RNZ (article) translated by Lauano Ilaoa:https://www.rnz.co.nz/news/national/532114/otago-man-becomes-first-jailed-in-new-zealand-for-3d-printing-firearms

Ata: Supplied / Otago Daily Times / Felicity Dear. RNZ.