Falepuipui se tagata Sāmoa na ‘aumaia fa’asolitūlāfonoina tagata faigāluega mai Sāmoa

‘E lē ‘o mafai ‘ona fa’ailoa fa’alaua’itele le suafa ‘o le tagata na ‘ioe ‘i lona mōliaga ‘i le Fa’amasinoga Fa’aitūmālō ‘o ‘Aukilani ‘i le aso ananafi, ‘i lona fesoasoani ‘i faiga fa’asolitūlāfono ‘o visa ‘e ‘aumai ai ni tagata faigāluega mō lana pisinisi.  Na fa’asalaina ‘i le falepuipui mō tausaga ‘e fā ‘ina ‘ua ‘ioe ‘i ona mōliaga ‘e 12. 

Na tā’ua ‘e Michael Carley, ‘o le pule ‘o le Immigration Compliance & Investigation, ‘e malaga so’o lava lea tagata ‘i Sāmoa ‘e sa’ili ni tagata mō lana pisinisi vali fale.  ‘E fa’atōsina mai ia tagata faigāluega ‘i Niu Sila, ‘i lalo ‘o le folafolaga ‘e su’e ai ni a lātou tupe ‘e lafo ‘i o lātou ‘āiga ‘i Sāmoa.

‘Ona fesoasoani lea ‘o lea tagata ‘e lagolago le visa asiasi ma va’ai le fa’agāsologa ‘o visa ‘o ia tagata mai Sāmoa ma totogi tau ‘o visa fa’apea ma pāsese.  ‘O le vā ‘o le 2014 ma le 2021, na fa’afaigāluega ai ‘e lē ‘ua falepuipui, ni tagata Sāmoa ‘i ni ‘auala ‘e lē tusa ai ma le tūlāfono, ‘i totonu ‘o Niu Sila ma fesoasoani ‘i isi, ia fo’i na solia tu’utu’uga ‘o lātou visa. Na silafia lava ‘e lea tagata, ‘e lē agava’a ‘i lātou na malaga mai, ‘e faigāluega ‘i Niu Sila, ma ‘o nisi fo’i ‘o i lātou, ‘e nonofo fa’asolitūlafono ai lava ‘ina ‘ua māe’a le aogā ‘o lātou visa asiasi.

Sā ia fa’atauānauina ‘e ala ‘i se taui fa’asolitūlāfono, se tasi ‘e iai sa lā feso’ota’iga ‘i le ‘Ōfisa ‘o femalāgā’iga ‘a Niu Sila ‘i Sāmoa ‘ina ‘ua talosaga mō visa ‘o ana tagata faigāluega.  ‘E māsani ‘ona fa’afaigāluega ‘ia tagata ‘i le silia ma le 40 ītūlā ‘i le vāiaso, ma totogi ‘i se ta’i $100 ‘i le aso, ma ‘ua maualalo ifo nai lō le totogi ‘āmata.  ‘E le’i totogiina ‘o lātou totogi ‘o aso mālōlō po’o ni aso ma’i, ‘e lēai ni payslips po’o ni māliliega tusitusia ‘o a lātou gāluega.

Link to RNZ (Article) translated: https://www.rnz.co.nz/news/national/557440/callous-exploitation-person-jailed-after-luring-workers-from-samoa-illegally

ATA: ABIGAIL DOUGHERTY/STUFF (RNZ).