Faitiona ‘e Clark ma Brash suiga ‘a le Palemia ‘i pōlisi mō le vā ‘i fafo

‘Ua tutū fa’atasi lē sa ‘avea ma Palemia Helen Clark ma Don Brash ‘e faitio ‘i le ali’i Palemia Christopher Luxon, ‘ona ‘o se suiga ‘ua ia faia ‘i pōlisi ‘a Niu Sila ‘ua fa’ate’ia ai le atunu’u mā ‘e ono fa’atīgā ai ‘iā Saina, le pā’aga pito telē ‘a le atunu’u ‘i fefa’ataua’iga.  ‘I le taimi lea na iai talu ai nei le palemia ‘i lana āsiasiga ‘i le Iūnaite Setete, na faia ai sana fa’atalanoaga ‘i le Financial Times, ma sā faia ai sana lafoga, ‘o le ‘ā fa’aopoopoina pea ‘e Niu Sila ‘ona fa’ailoa matā’upu ‘o gaioiga fa’asipai ‘a Saina. 

Na ia saunoa fo’i, ‘o lea ‘ua tatala atu lava ‘e Niu Sila le avanoa ‘e mafai ‘ona ‘āuai ai ‘i le vaega lona lua ‘o le mafutaga ‘o le AUKUS, lea ‘e faipā’aga ai ‘Ausetālia, Peretania ma le Iūnaite Setete ‘i le tūlaga tau ‘i le puipuiga po’o mālosi’aga fa’amiliteli.  Sā talanoa fo’i ‘e uiga ‘i le Mālosi’aga tau le Puipuiga po’o le Militeli ‘a Niu Sila ‘e mafai ‘ona ‘avea ‘o se mālosi’aga fa’aopoopo mō ‘Ausetālia ma le Iūnaite Setete ma isi ā lātou pā’aga.  ‘O le pō ‘o le Aso Lua na fa’alauiloa ai se fa’amatalaga tu’ufa’atasi ‘a Clark ma Brash, ‘o ni ta’ita’i na vevela fo’i fīnauga ‘i taimi ‘o fa’atōsina ‘o faigā pālota ‘i le 2005, ma sā o lā fa’ailoa ai, ‘o le ‘ā matuā faigatā lava ‘ona fa’atūmau le so’otaga po’o le fa’auōga māfanafana ma Saina pe ‘ā fai ‘e fa’aauau pea ‘e le faigāmālō ‘ona lagolago ‘i le Iūnaite Setete. 

‘O Clark sā ‘avea ma Palemia ‘o le faigāmālō ‘a le Labour ‘ina ‘ua ‘avea Niu Sila ma mālō muamua ‘i le OECD po’o mālō ‘e lelei o lātou ātina’ega, na sainia se māliliega ‘o fefa’ataua’iga sa’oloto ma Saina.  ‘O Brash sā ‘avea ma ta’ita’i ‘o le National ‘i sina taimi mulimuli ane na ‘avea ma ta’ita’i ‘o le ACT.

ATA: Helen Clark & Don Brash (Source: 1News).