Faitiona ‘e Carmel Sepuloni le mālō ‘ona ‘o tu’ua’iga ‘i pūlēgānu’u ‘i le tau ‘o le soifuaga

‘Ua faitioina ‘e le sui ta’ita’i ‘o le Labour, Carmel Sepuloni, le faigāmālō, ‘ona ‘o tu’ua’iga ‘e fa’asaga ‘i pūlēgānu’u ‘e fa’apea ‘o lātou ‘ua māfua ai fa’afītāuli ‘i le tau ‘o le soifuaga.

‘I fa’amaumauga ‘a le StatsNZ na fa’alauiloa ‘i le aso ananafi, na tā’ua ai, na si’itia ‘i le 4.1 pasene, le tau ‘o le soifuaga ‘i le tausaga, ‘o se si’itaga maualuga ‘i le silia ma le lua tausaga, ‘a’o si’itia ai le tau ‘o suau’u talu ai le taua ‘a ‘Amerika ma Iran.  Na saunoa ai le Minisitā ‘o Tupe, Nicola Willis ‘e fa’apea, ‘ua māfua le si’itia ‘o ia fuainūmera, ‘ona ‘o le peresetene ‘o ‘Amerika, Donald Trump, ma ‘e lē mafai ‘e le mālō ‘ona pūleaina le tūlaga fa’alētonu ‘i le tau fa’avāomālō ‘o le suāu’u.

Peita’i, ‘e lē na’o suau’u na si’itia ai le tau ‘o le soifuaga.  Na si’itia fo’i le tau ‘o le ‘eletise ‘i le tausaga, ‘i le 12 ma le 9 pasene.  Na saunoa Willis, ‘o le fuafuaga ‘a le mālō ‘e fa’atapula’a ai le si’itaga ‘o rates ‘a pūlēgānu’u ‘i le 4 pasene ‘i le tausaga, ‘o le ‘ā fesoasoani tele ‘e tu’u itīitia ai le faigatā ‘o lo’o iai. 

‘Ae na saunoa Sepuloni, na si’itia ‘e pūlēgānu’u lāfoga po’o rates, ‘ona ‘ua o lātou feagai ma ni tūlaga faigatā tele ‘i le tau ‘o le soifuaga.  ‘Ua so’ona fa’afaigōfie ‘e le Mālō le matā’upu. ‘E lē mafai ‘ona lātou fa’afō’ia fa’afītāuli ‘o le si’itia ‘o le tau ‘o le soifuaga, ma o lātou taumafai ai ‘e tu’ua’i le leaga ‘i pūlēgānu’u.  Sa ia faia ai le si’itaga ‘e lata ‘i le 8 pasene ‘o lāfoga po’o rates ‘a le Pūlēgānu’u ‘a ‘Aukilani, mā ‘o se tasi māfua’aga ‘ona ‘o le si’itia ‘o tau ‘o le polōketi ‘o le City Rail Link.

Link to RNZ (Article): https://www.rnz.co.nz/news/political/766855/carmel-sepuloni-accuses-government-of-blaming-council-for-cost-of-living-pressures

IMAGE/ATA: RNZ / Angus Dreaver