Faitioina ‘e Chris Hipkins ‘ia Vaovasamanaia ‘i le fa’ailoga lanu ‘i le Palemene

Na faitioina ‘e le ta’ita’i ‘o le Labour Chris Hipkins, le afioga ‘a Vaovasamanaia Winston Peters ‘i le fa’ailoga lanu ‘i le Palemene ma ia vala’au ai fo’i ‘i minisitā ‘o le National pe ‘aiseā na o lātou lē tali pe tete’e atu ai ‘i ia amioga.  Na fa’aalia ‘e le Green, ‘ua fa’atauagavale Peters ‘i tagata mai fafo, ‘ae saunoa le ta’ita’i ‘o le ACT David Seymour, ‘o lo’o taumafai Vaovasamanaia ‘ia āmana’ia atu ia ‘e tagata. 

Na māfua fe’upua’iga, ‘ona ‘o le taimi na fai ai taligāfesili ‘i le Aso Lulu.  ‘Ina ‘ua fa’aaogā ‘e le faipule ‘o le Green Teanau Tuiono le ‘upu “Aotearoa” ‘ina ‘ua fai ana fesili ‘e uiga ‘i fesoasoani ‘o lo’o faia mō le Pasefika ‘ona ‘o le a’afiaga mai suiga ‘o le tau.  Lea na fa’asalāvei atu ai Vaovasamanaia ‘i sana fesili ‘e fa’apea: ‘Aiseā ‘e tali ai le minisitā ‘i se fesili mai se tagata ‘e sau mai Rarotonga, ‘i se atunu’u ‘ua igoa ‘iā Niu Sila.  Na fa’asalāvei atu le Fofoga Fetalai peita’i na tū a’e ‘i luga Hipkins ma saunoa, ‘e tutusa ‘uma sui ‘o le Maota.  Ma o se faiga fa’ailoga lanu, le tū a’e ‘i luga ‘o se sui ‘o le Maota ma fesiligia se sui ‘o le Palemene pe agava’a ‘e fai sana fesili ‘ona ‘o le atunu’u ‘e sau ai.  Ma na saunoa Hipkins ‘i le Fofoga Fetalai, sa tatau lava ‘ona ia taofia mai le ‘āmataga.  Peita’i na saunoa Gerry Brownlee na te le’i lagonaina ‘ae ‘o le ‘ā iloilo ‘i se taimi ‘o mulimuli mai.  ‘O Tuiono ‘o le Le Atu Kuki ma ‘o ia fo’i ‘o se Māori peita’i na fānau ‘i Niu Sila.

Link to RNZ (Article) translated: https://www.rnz.co.nz/news/political/587214/chris-hipkins-accuses-winston-peters-of-pure-racism-in-parliament

ATA:  RNZ