Faitio Chris Hipkins ‘i le faiga ‘o tagata Māori

‘Ua tu’ua’ia ‘e le ta’ita’i ‘o le pātī ‘a le Labour ‘o Chris Hipkins, le faigāmālō so’ofaatasi, ‘i le fa’aauau pea ‘o ana faigafa’avae ‘e fa’asagatau ai ‘i tagata Māori ‘o Niu Sila, ma ia tā’ua ai, ‘ua tatau ‘ona tāofi ma fa’amuta ia itū’āiga ‘o faiga.

‘O ia lagona ‘o Hipkins sā fa’alaua’itele ‘i le taimi ‘o sana saunoaga ‘i se fonotaga na ‘āuai ai i ‘Aukilani ‘i le Aso To’ona’i na te’a nei.

Na ia tā’ua ai, ‘o le vāiaso na tuana’i atu nei ‘i totonu ‘o le Palemene ‘i Uēligitone, sā pei lava ‘o le tele ‘o isi vāiaso ‘ua tuana’i talu ‘ona tūla’i mai le faigāmālō so’ofaatasi, ‘i le fa’aauau pea ‘ona osofa’ia ma fa’atino faiga lē talafeagai ‘e fa’asagatau ai ‘i tagata Māori ‘o le atunu’u.

Na tā’ua ‘e le ta’ita’i ‘o le Labour, ‘o le līpoti āloa’ia ‘a le Komisi Su’esu’e lea na fa’avaeina ‘e silasila ‘i sauaga na a’afia ai tamaiti ma tagata sā i lalo ‘o le tausiga ‘a le mālō ma isi fa’alāpotopotoga tūma’oti, lea na fa’alaua’itele mai ‘i le vāiaso na t’ea nei, ‘o lo’o manino mai ai, ‘e aupito ‘i to’atele lava tamaiti ma tagata Māori na āfāina ai, fa’atusa ‘i isi tagata ‘uma ‘o le atunu’u.

‘Ae ‘o le māe’a ai ‘o felafolafoāi’ga ‘a le maota ‘e tusa ‘o lea līpoti, ‘ae pāsia le lafo ‘a le Mālō ‘ua suia ai le Tūlāfono ma ‘ave’esea ai nofoa fa’apitoa mō tagata Māori ‘i totonu ‘o pūlega ‘o nu’u ma itūmālō po’o city councils.

Na fa’amamafaina ai ‘e Hipkins, ‘o lenei fa’ai’uga, ‘ua fete’ena’i ma le mana’o ‘o pūlega ‘o nu’u ma itūmālō.  ‘O le tāofi ‘o pūlega nei, ‘e tatau ‘i le mālō ‘ona ta’atia atu la lātou gāluega ma lā lātou matāfaioi na filifilia ai, ‘e fa’atino ‘e tusa ‘o le Tūlāfono.

Sā tē’ena mālosi fo’i ‘e Hipkins le fuafuaga ‘e fa’amālosi ai tupulaga talavou solitūlāfono, ‘ina ‘ia ‘āuai ‘i ni polokalame fōliga ‘i a’oa’oga ma tolēniga fa’amiliteri, ia ‘e tā’ua ‘o boot camps.

‘E māfua ‘ona ‘o fuainūmera ‘o lo’o iai nei, ‘o lo’o manino mai ai, ‘o le to’a 9 ‘o talavou nei mai le aofa’iga ‘e to’asefulu, ‘o tama ma teine Māori.

ATA: Chris Hipkins. RNZ / Angus Dreaver.