Faitau afe tupulaga talavou ‘o le ‘ā lē toe maua le penefiti mō tagata ‘e lēai ni gāluega.

‘O le pō ‘o le Aso Faraile na pāsia ai ‘i tūlaga fa’anatinati ‘e le Palemene ‘i Uēligitone, le suiga ‘o le Tūlāfono ‘o mea tau penefiti, lea ‘o le ‘ā taofia ai ‘e lē toe maua ‘e le faitau fia afe ‘o tupulaga talavou le penefiti mō tagata ‘e lēai ni gāluega, le unemployment benefit.

‘E ‘āmata fa’amamalu lea suiga ‘o le Tūlāfono ‘i le māsina ‘o Nōvema ‘o le tausaga nei lea ‘o le ‘ā fa’amuta ai, ‘e lē toe maua ‘e tama ma teine 18 ‘i le 19 tausaga le mātutua, ‘ia le penefiti su’e gāluega, le jobseeker benefit, pē ‘ā fai lea ‘e sili atu ‘i le $67,225 ‘i le tausaga ‘ia tupe maua ‘a o lātou mātua.

‘O le taimi na mua’i fa’ailoa mai ai lenei faiga fa’avae ‘a le Mālō, na fa’atūlaga ai le tapula’a ‘o tupe maua ‘a mātua ‘i le $65,000 ‘i le tausaga peita’i, sā toe faia ‘i ai ni suiga a’o le’i pāsia le tūlāfono, lea ‘ua o’o ai nei ‘i le $67,225 ‘i le tausaga.

Sā iloa ai ‘iā ‘Oketopa ‘o le tausaga ‘ua mavae, ‘e tusa ma le 4,300 le aofa’iga ‘o tama ma teine talavou, ‘o le ‘ā lātou lē toe maua ai le penefiti su’e gāluega lenei mai le Mālō Niu Sila.

Sā fa’aalia ai ‘e le minisitā ‘o le Matāgāluega ‘o le Ātina’e Lautele, po’o le MSD, lea ‘e pūlea ma fa’afoeina Penefiti, ‘o Louise Upston, ‘o le suiga lenei ‘o le tūlāfono, ‘e atagia ai le mana’o ‘o le Mālō ‘e fa’aitīitia le fa’alagolago ‘o tagata ‘i le penefiti, ‘ae ia ūna’ia ‘e su’e ni gāluega ‘e soifua ai.

Link to RNZ (Article): https://www.rnz.co.nz/news/politics/1169347/thousands-of-youths-to-lose-access-to-unemployment-benefits-after-welfare-law-change

IMAGE/ATA: Kim Baker Wilson / RNZ