Faitau afe tagata na lolofi atu ‘e molimauina le tatala ’o le āta fou ‘ua fa’aigoaina ‘o TINĀ

‘E faitau āfe tagata na lolofi atu ‘e molimauina le ulua’i fa’aaliga ‘o le āta ‘ua fa’aigoaina ‘o Tinā, lea sā fa’aalia ‘i ‘Aukilani ‘i le afiafi ‘ananafi.

‘O le Susuga Miki Magasiva le fa’atonu ‘o le āta tīfaga, ma na pu’eina fa’atatau ‘i le māe’a ai ‘o le mafui’e tele ‘i Kalaiesetete ‘i le 2011, ma ‘e taula’i ‘i mafatiaga, ‘o le alofa, ‘o le taliaina ‘o mea ‘ua tutupu ma le tāua ‘o le mafutaga ma tagata lautele.

‘O le tala ‘o lo’o fa’amatala mai ‘i le āta, ‘e uiga ‘i le ōlaga ‘o le tinā iā Mareta, sā maua lona avanoa fa’afaiā’oga ‘i se ā’oga ‘e ā’o’oga ai tamaiti mau’oloa, ‘a’o feagai ai ma fa’anoanoaga mai le maliu ‘o si ana tama teine ‘i le mafui’e tele ‘i Kalaiesetete ‘i le 2011.

Fa’aalia ‘e le fa’atonu o le āta tīfaga Miki Magasiva, ‘e 6 tausaga ‘o gālulue ‘i le tu’ufa’atasiga ‘o le āta, ‘e aualofa ma manatua ai nai ō tātou tinā Sāmoa, ‘e telē lō lātou sao ‘i le ōlaga ‘o aso ‘uma ‘i totonu ‘o ‘āiga.

‘O le Āso 27 ‘o le māsina nei ‘e fa’aalia ai ‘i fale tīfaga le āta Tinā ‘i totonu ‘o Niu Sila pei ona līpotia ‘e le 1News.

Link to 1News (Article) translated by Anna Fa’asolo: https://www.1news.co.nz/2025/02/11/thousands-gather-for-nz-film-premiere-of-tina/

ATA: Tinā – film.