Faigatā le suiga fou ‘o le Matematika mō ā’oga lāiti

‘Ua ‘āmata lenei tausaga fa’alea’oa’oga mō ā’oga lāiti po’o primary schools ‘i totonu ‘o Niu Sila, ‘i le fa’aaogāina lea ‘o se fa’asologa ma se faiga fou ‘e a’oa’oina ai le matā’upu ‘o le matematika, po’o le nūmera.

Peita’i la, ‘o le curriculum fou lenei mō le Maths, ‘e pei ‘ona fa’ailoa mai, ‘e sili atu ‘ona faigatā nai lō le faiga tuai sā sau ai.
‘Ua iloa ‘i su’ega ‘e tusa ma le 42 pasene ‘o tamaiti ‘ua tausaga i’u ‘i totonu ‘o ā’oga lāiti, sā lātou a’oa’oina le matematika ‘i le faiga tuai, ‘ae na’o le 20 pasene ‘o lea aofa’iga ‘e gafatia mana’oga ‘o le faiga po’o le curriculum fou lea ‘ua fa’atinoina nei.

Na fa’ailoa mai ‘e se tasi ‘o pule ā’oga, ‘e ono tūta’ia le naunau ‘o tamaiti ā’oga fa’apea ai ma faiā’oga, pe ‘ā fai lātou te lē ‘ausia le maualuga ‘ua fa’atūlaga mai mō lātou tausaga.

‘O nisi ‘o faiā’oga, ‘o lo o popole, ‘ona ‘ua vave tele ‘ona una’i mai ‘e le mālō, le fa’atinoina ‘o le faiga fou lenei ‘e a’oa’oina ai le matematika mō ā’oga lāiti po’o primary schools.

Link to RNZ (Article) translated by Lauano Ati Ilaoa: https://www.rnz.co.nz/news/national/541366/new-maths-curriculum-begins-in-primary-schools

ATA: RNZ / Richard Tindiller