Faigatā le si’itia ‘o tau ‘o ‘a’ano manu fasi ma fuālā’au faisua

‘E 4.5 pasene na si’itia ai le tau ‘o ‘oloa ‘i le tausaga ‘ātoa ‘e o’o mai ‘i le māsina ‘o Fepuari, ‘aemaise lava ‘i le mince ‘e gaosi mai le povi, ‘e tusa ma le 23.2 pasene na si’itia ai lona tau, ‘i le $24.46 ‘i le kilokalama.

‘E 9.4 pasene na si’itia ai le tau ‘o fuālā’au ‘aina mata ma fuālā’au faisua, ‘ae 7.5 pasene na si’itia ai ‘a’ano ‘o manu fasi, moa fa’apea ma i’a ‘i le tausaga.  Na māta’itū toto’a fo’i ‘e le polokalame ‘a le Checkpoint le tau ‘o ‘oloa ‘e fa’aaogā ‘i totonu ‘o ‘āiga ‘i aso ta’itasi, ‘i supamāketi ta’itasi ‘i totonu ‘o tausaga ‘e 4. 

‘I fa’amaumauga ‘a le ‘Ōfisa ‘o Fuainūmera Fa’amaumauina na fa’alauiloa ‘i le Aso Lua, ‘e tusa ma le 21.4 pasene na si’itia ai le tau ‘o le fasipovi ‘o le Sirloin steak po’o le $44.71 ‘i le kilokalama.  ‘O sukalati, ‘e 20.3 pasene na si’itia ai.  Na fa’aalia ‘e nisi tagata fa’atau ‘i luga ‘o le Checkpoint ‘ua lata ‘ina fa’aluaina le tau o le pata.  ‘E iai nisi tagata ‘ua fa’ailoa lo lātou lē toe fa’atauina ‘o ni ‘a’ano ‘o manu fasi.

Ui ‘i lea ‘e 6.2 pasene na pa’ū ai le tau ‘o le tāseni fuāmoa ‘i le $8.77.  Na saunoa le ta’iulu ‘o le ‘au faitōfā ‘o le tamāo’āiga ‘a le faletupe ‘o le BNZ, Mike Jones, ‘ua matuā maoa’e le tau ‘o ‘a’ano ‘o manu fasi ‘i atunu’u ‘i fafo, ‘e māfua ‘ona tūlaga faigatā ‘o le māketi ‘i le Iūnaite Setete.

ATA: RNZ / Richard Tindiller