Faia ni suiga ‘e agava’a ai tagata mō gāluega fa’aleoleo

‘O suiga fou ‘i aiāiga ‘e mafai ai ‘ona agava’a le tele ‘o ni tagata mō gāluega fa’aleoleo, ‘o le fa’ataga lea ‘o ē ‘ua iai laisene ‘ua iai tu’utu’uga fa’apitoa po’o le restricted licence ‘e talosaga mō avanoa ‘i gāluega fa’aleoleo.  Na tā’ua ‘e le Komesina lagolago Jill Rogers, ‘o lea faiga, ‘o le ‘ā fa’aopoopo ai le nūmera ‘o leoleo, ‘e ala ‘i le tu’u avanoa ‘i le silia ma le 250,000 ‘o tagata ‘o lo’o ‘ūmia laisene ‘e iai tu’utu’uga fa’apitoa. 

‘E tūmau pea le mauāluga ‘o le tūlaga ‘e tatau ‘ona ‘ausia mā ‘e lē suia peita’i ‘ua lātou iloa vāega ‘o lo’o aofia ‘i totonu ‘o ta’iala ‘e filifili ai leoleo, ‘e iai ma nisi vāega ‘o lo’o poloka ai avanoa mō nisi tagata ‘o lo’o iai agava’a pei ‘ona tā’ua ‘e le Komesina lagolago.  Na ia tā’ua fo’i, ‘e tatau ‘i tagata talosaga ‘ona maua laisene ‘āto’atoa ‘a’o le’i ‘āmataina a’oa’oga peita’i ‘o ia suiga, ‘o le ‘ā vave o’o ai ia tagata ‘i le ‘auala ‘o lo’o fa’agāsolo ai le ‘avea ma leoleo. 

Sā va’ava’ai le matāgāluega ‘ina ‘ia fa’ato’atele le fuāinūmera ‘o tagata ‘e talosaga mō ia avanoa faigāluega fa’atusatusa ‘i le tausaga talu ai.  ‘O le Pāketi po’o le Tala Fa’atatau ‘autū ‘o le Tupe ‘a le mālō, ‘o lo’o aofia ai le silia ma le 220 miliona tālā ‘ia o’o atu ‘i le fa’ai’uga ‘o le tausaga ‘ā sau, ‘ua mafai ‘ona a’oa’o ai ni leoleo fou se to’a 500. ‘O le māsina ‘o Mē na ta’u atu ai ‘e le Komesina ‘o Leoleo Andrew Coster ‘i le ‘aufaigāluega, ‘e to’a 175 ē ‘e le’o fa’atautōina, ‘o le ‘ā vāea, ‘ina ‘ia fa’amalieina ai le mana’oga ‘o le mālō, ‘e fa’asao le 55 miliona tālā mai la lātou pāketi.

ATA: NZ Police (Source: 1News).