Faia ni fa’afiafiaga ‘a le ali’i pese lauiloa ‘o Sir Cliff Richard ‘i Niu Sila

E fā ni fa’afiafiaga ‘a se tasi ‘o ali’i pese lauiloa ‘a Peretānia, ‘o Sir Cliff Richard, ‘o le ‘ā faia ‘i Niu Sila nei ‘i le tausaga ‘a sau.  ‘O lenei ali’i pese ‘ua 84 tausaga ‘o le soifua, mā ‘o lo’o manatua ‘e le ‘au mātutua le tele ‘o ana pese sā lauiloa ai ‘e pei ‘ ole “Living Doll”, “We Don’t Talk Anymore” ma le “Devil Woman”…

‘O le tausaga ‘e 2013 ‘o lo’o gata mai ai le faia ‘o ni ana fa’afiafiaga ‘i Niu Sila nei.

‘Ua fa’ailoa mai ‘e fa’apea, ‘o lana malaga mai ‘i le tausaga ‘ā sau, ‘o le ‘ā ‘āmata ai ana koneseti ma fa’afiafiaga ‘i ‘Aukilani ‘i le aso 14 ma le 15 ‘o Nōvema, ‘ona malaga mai ai lea ‘i le laumua ‘i Uēligitone, ‘e fa’afiafia ai ‘i le Michael Fowler Centre ‘i le aso 17 ‘o Nōvema ma fa’asolo atu ai ‘i le ‘a’ai ‘o Kalaiesetete ‘i le aso 19 ‘o Nōvema ‘e fa’afiafia ai ‘i le Christchurch Town Hall.

‘O Sir Cliff ‘ua sili atu ‘i le 250-miliona le aofa’iga ‘o ana records ‘ua fa’atau ‘i tua ‘i itū ‘ese’ese ‘o le lalolagi.  ‘O ana gāluega fesoasoani mō tagata puapuagātia na fa’ae’e ai ‘iā te ia le fa’ailoga taualoa ‘a Peretānia ‘o le  Naite, ‘i le tausaga ‘e 1995.

‘O pepa ulufale mō ana fa’afiafiaga ‘i Niu Sila nei, ‘e ‘āmata ‘ona maua ‘i le Live Nation ma le Mellen Events taeao, le aso 16 ‘o ‘Oketopa ma le aso Faraile 18 ‘o ‘Oketopa.

Link to RNZ (Article) translated by Lauano Ilaoa: https://www.1news.co.nz/2024/10/14/sir-cliff-richard-announces-2025-new-zealand-tour/

ATA: Sir Cliff Richard has announced a tour of New Zealand in 2025. (Source: Michelle Kloboucnik) – RNZ