Faia mailei ‘e su’e ai le ‘iniseti fa’alāfuā ‘o le fruitfly ‘i ‘Aukilani ‘i Saute

‘E silia ‘i le selau le aofa’i ‘o ni mailei, ‘ua faia nei ‘i itū ‘ese’ese ‘o ‘Aukilani ‘i Saute lea na maua ai ‘i le Aso Fraile talu ai le ‘iniseti fa’alāfuā ‘e fa’aigoaina ‘o le FruitFly.  Na fa’ailoa mai ‘e le vāega mō le puipuiga ‘o fa’ato’aga mai ‘iniseti fa’alāfua, le Biosecurity New Zealand, ‘e tasi le ‘iniseti fruitfly, na maua ‘i se mailei ‘a le matāgāluega ‘i le pitonu’u ‘o Papatoetoe.

Na tā’ua ai ‘e le ali’i komesina ‘o lea matāgāluega, ‘o Mike Inglis, ‘ua gāioi nei lo lātou ‘ōfisa ‘e faia taumafaiga ‘uma ‘ina ‘ia mautinoa ai ‘e lē salalau tele atu lenei ‘iniseti ‘i isi vāega ‘o le atunu’u, ma lamatia ai le ātīna’e ‘o lā’au ‘aina ma lā’au totō.

Na ia tā’ua fo’i ‘ua fa’amamaluina nei mō le ‘umi ‘e lua vāiaso, le sā ‘i le fe’avea’iina ‘o fuālā’au ‘aina mai le vāega tonu ‘o lo’o fa’asino ‘i ai gāioiga ‘a le Biosecurity New Zealand ‘i ‘Aukilani ‘i saute.  ‘E 187 le aofa’iga ‘o mailei ‘ua ‘uma ‘ona faia ‘i ‘ōgā’ele’ele mai Papatoetoe āga’i ane ‘i Mangere mā ‘e 105 nisi mailei ‘o le ‘ā faia ‘i totonu ‘o le li’o ‘e 1500 mita fa’atāfafā mai le nofoaga na maua ai le fruitfly ‘i le Aso Faraile.

‘O le ‘iniseti na maua ‘o le ītū’āiga ‘e fa’aigoaina ‘o le Oriental fruitfly ‘e ta’atele ‘i atunuu ‘o ‘Āsia mā ‘e ola lelei ‘i tau māfanafana.   ‘O lā’au ‘aina ‘e āfāina tele ai ‘i ‘iniseti nei, ‘e aofia ai fuālā’au fai kuka ‘ātoa ma fuālā’au taumafa mata ‘e iai le ‘apu, ku’ava, mago, peach ‘ātoa ai ma le pea.

 Link to RNZ (Article) translated by Lauano Ilaoa: https://www.rnz.co.nz/news/national/538201/fruit-fly-incursion-more-than-100-new-traps-set-up-around-south-auckland

Mike Inglis, Biosecurity Commissioner North, with a new sign showing the secured fruit fly area in Papatoetoe. ATA: RNZ / Maia Ingoe