Fa’avalevalea le fautuaga ‘a le Komesina ‘e fa’aitīitia ai supa ‘a le ‘aufaigāluega

‘O lo’o faitioina ‘e leoleo la lātou komesina, ‘ona ‘o se īmeli na liki pe saofia ‘i tua, ‘o lo’o fautuaina ai le fa’aitīitia ‘o saofaga ‘o supa’āniueta ‘a le ‘aufaigāluega, ‘ina ‘ia fa’asao ai tupe, talu ai le fa’alētonu ‘o se ofo mō totogi.  ‘O le īmeli lea ‘e pei ‘ona tā’ua, na lafoina ‘i le ‘aufaigāluega ‘a leoleo, mai le Komesina, Andrew Coster, mā ‘o lo’o talanoa ai ‘i leoleo, pe tatau ‘ona fa’ata’atia ‘ese ‘a lātou saofaga ‘i le polokalame ‘o supa’āniueta ‘a leoleo, ‘e fa’afetaui ai le ofo mulimuli ‘a le mālō mō totogi, ‘ona ‘e lē’o ō gatasi ma le tau ‘o le soifuaga. 

‘O le tala a se tasi ‘o leoleo ‘ua silia ma le 20 tausaga ‘o galue, ‘ua lagona ‘e leoleo le lē fa’atāuaina ‘o i lātou.  ‘Ua silia ma le tausaga ‘o finau le ‘Asosi ‘a Leoleo ma le Mālō ‘e fa’atatau ‘i ō lātou totogi.  Sā filifilia se fa’atonu fa’atūma’oti ‘i le māsina ‘o ‘Aperila, ‘e filifili, po’o fea ‘o ofo mulimuli ia na tu’uina atu ‘e itū ‘e lua, ‘e ao ‘ona talia, ‘ina ‘ua lē mafai ‘ona maua se i’uga ‘o fa’atalanoaga.  Sā ia fa’ailoa ‘i le Aso Gafua le fa’ai’uga, pei ‘ona filifilia ai le ofo mulimuli ‘a le faigāmālō, lea ‘e aofia ai le ta’i $1500 ‘o se tupe ‘e tasi le taimi ‘e totogi ‘ātoa ai, ‘o le si’itaga ‘o totogi mō leoleo ‘e ta’i $5000, ma le isi 4 pasene ‘e si’itia ‘i le māsina ‘o Iūlai fa’apea ai ma le tausaga e 2025. 

‘E iai fo’i le si’itaga ‘e 5.25 pasene ‘o ‘alauni ‘e toe fo’i ‘e ‘āmata mai ‘iā Novema ‘o le tausaga talu ai.  Na fa’aalia ‘e se tasi ‘o leoleo ‘i le Leitiō Niu Silla, sā fiafia sui ‘o le ‘Asosi ‘a Leoleo ‘e fa’aulufale atu le Minisitā Fou, Mark Mitchell, peita’i, ‘e le’o savali ‘i ana ‘upu.  Na saunoa Mitchell, ‘o le fa’ai’uga pito sili lea ‘ona lelei, ‘ua i’u ‘i ai se taumafaiga ‘a le mālō.  Ma ‘o le taimi muamua fo’i lea, ‘o le ‘ā totogi taimi ia ‘e ‘ova ai ‘ona faigāluega leoleo.

ATA: NZ Police / RNZ.